اسلام آباد : اسلام آباد ہائی کورٹ نے پی ٹی آئی کا دفتر فوری ڈی سیل کرنے کا حکم دے دیا اور سی ڈی اے کے خلاف پی ٹی آئی کی درخواست منظور کرلی۔
تفصیلات کے مطابق اسلام آباد ہائی کورٹ نے سی ڈی اے کے خلاف پی ٹی آئی کی درخواست پر محفوظ فیصلہ جاری کردیا، جسٹس ثمن رفعت امتیاز نے چھ صفحات پر مشتمل تحریری فیصلہ جاری کیا۔
فیصلے میں سی ڈی اے کے خلاف پی ٹی آئی کی درخواست عدالت نے منظور کرلی گئی اور کہا گیا کہ سی ڈی اے نے 2022 اور 2023 میں سابق مالک کو نوٹس اور پھر شوکاز نوٹس جاری کیا، سی ڈی اے کوئی وضاحت پیش نہ کر سکا کہ نوٹسز پرانے مالک کو کیوں بھیجے جاتے رہے۔
عدالت نے کہا سب سے اہم یہ ہے کہ نوٹس یا شوکاز نوٹس کی سروس کی کوئی رسید ریکارڈ پر نہیں، سی ڈی اے کا بنایا گیا ایک رجسٹر نوٹسز پہنچنے کا کافی ثبوت نہیں ہے۔
جسٹس ثمن رفعت امتیاز کا کہنا تھا سی ڈی اے نے پی ٹی آئی مرکزی سیکرٹریٹ سیل کرنے کا آرڈر سے پہلے کوئی نوٹس نہیں کیا۔
مزید پڑھیں : اسلام آباد میں پی ٹی آئی کے مرکزی دفتر کو سیل کردیا گیا
فیصلے میں کہاگیاہے کہ سی ڈی اے کا دفتر سیل کرنے کا آرڈر بھی نہ پی ٹی آئی کو نہیں لکھا گیا نہ کاپی بھیجی گئی، عدالت تحریک انصاف کا سیکرٹریٹ فوری ڈی سیل کرنے کا حکم دیتی ہے اور یہ وضاحت کی جاتی ہے کہ سی ڈی اے قانون کی خلاف ورزی پر قانون کے مطابق کارروائی کر سکتا ہے۔
یاد رہے 24 مئی کو اسلام آباد میں پی ٹی آئی کے مرکزی دفتر کو سی ڈی اے کی جانب سے سیل کردیا گیاتھا۔
سی ڈی اے کی جانب سے پی ٹی آئی دفتر کے کچھ حصے کو بھی گرایا گیا تھا ، حکام کا کہنا تھا کہ سیکٹر جی 4/8 میں سیاسی جماعت کی قائم غیرقانونی تعمیرات کو ختم کیا جارہا ہے۔
حکام کا کہنا کہ پلاٹ سے ملحقہ اراضی پر قبضہ کرکے بڑے پیمانے پر تجاوزات قائم کی گئی تھیں، بلڈنگ قوانین پر عملدرآمد کرنے اور تجاوزات کے خاتمے کے لیے آپریشن کیا گیا ہے۔
