کراچی : بھتے کیلئے اسٹور پر فائرنگ کرنیوالے 2 لیاری گینگ وار کے کارندوں کو رنگے ہاتھوں گرفتار کرلیا گیا، ابتدائی تفتیش کے دوران ملزمان نے اہم انکشافات کئے۔
تفصیلات کے مطابق کراچی میں کھارادرپولیس نے دوران گشت کارروائی کرتے ہوئے بھتے کیلئے اسٹور پر فائرنگ کرنیوالے 2 ملزمان کو رنگے ہاتھوں گرفتار کرلیا۔
ایس ایس پی سٹی عارف عزیز نے بتایا کہ ملزمان کا تعلق وصی اللہ لاکھوگروپ سے ہے، ملزمان سے 2 پستول اورموٹر سائیکل برآمد کرلی ہے۔
عارف عزیز کا کہنا تھا کہ ملزمان میں رضوان اور کبیر شامل ہیں ، ملزم رضوان سلمان پٹھان کابھائی ہے اور مفرور ملزم سلمان پٹھان وصی اللہ لاکھو کا فرنٹ مین ہے۔
ایس ایس پی سٹی نے کہا کہ سلمان قتل، اقدام قتل، بھتہ خوری اورڈکیتی مقدمات مطلوب ہے، ابتدائی تفتیش کے دوران ملزمان نے اہم انکشافات کئےہیں۔
انھوں نے مزید بتایا کہ 22 اپریل کو وصی اللہ لاکھو کے کہنےپررحمان بریانی پرفائرنگ کی، 30 اپریل کو بھتے کے لیے موٹر سائیکل شوروم پر فائرنگ کی جب گزشتہ روز ملزمان ماشااللہ اسٹور پر فائرنگ کرنے آئے تھے تو غلطی سےمہران بیکری پر فائرنگ کردی جس سے بیکری ملازم زخمی ہوا۔
عارف عزیز نے کہا کہ بعد میں ملزمان نے ماشااللہ جنرل اسٹورپر بھی فائرنگ کی، فرار ہوتے وقت پٹرولنگ پر مامور پولیس نے گرفتار کیا تاہم مزید کارروائی کیلئے ملزمان کو ایس آئی یو کے حوالے کیا جا رہا ہے۔
