لاہور: لاہور ہائیکورٹ نے پی ایم ڈی سی کی جانب سے کرغزستان کی یونیورسٹیوں کی ڈگریوں کو منظور نہ کرنے کے معاملے کی جوڈیشل انکوائری کروانے کی درخواست پر وفاقی حکومت سے جواب طلب کر لیا۔
لاہور ہائیکورٹ کے جسٹس ساجد محمود سیٹھی نے درخواست پر سماعت کی، درخواست گزار نے عدالت کو بتایا کہ کرغزستان میں یونیورسٹیوں کو پی ڈی ایم ڈی سی نے ریگولیٹ نہیں کیا، متعدد یونیورسٹیوں کی ڈگریوں کو پی ایم ڈی سی منظور نہیں کرتی۔
درخواست گزار نے مزید کہا کہ یونیورسٹیوں کو ریگولیٹ نہ کرنے پر مخلتف حکام کو خطوط لکھے لیکن سب بے سود رہا، اس معاملے میں چھان بین کے لیے جوڈیشل کمیشن کی تشکیل کے لیے بھی متعلعہ حکام سے رابطہ کیا گیا لیکن کوئی شنوائی نہیں ہوئی۔
درخواست گزار نے کہا پاکستان میں ایک مافیا کرغزستان میں تعلیم کے نام پر عوام کو لوٹ رہا ہے، کرغزستان میں طلبہ اپنی تعلیم مکمل کر چکے ہیں لیکن ان کی ڈگریوں کی کوئی حیثیت نہیں ہے، یہ کرغستان میں پڑھنے والے پاکستانی بچوں کے مستقل کا معاملہ ہے، اس لیے اس معاملے کی جوڈیشل انکوائری کروا کر حقائق سامنے لائے جائیں۔
درخواست گزار نے عدالت سے استدعا کی کہ یہ عدالت کرغزستان کی ڈگریوں کو پاکستان میں منظور کیے جانے کا حکم دے۔
