پاکستان پیپلز پارٹی کی جانب سے بجٹ میں ملازمین کی تنخواہوں میں 25 سے 30 فیصد اضافے کا مطالبہ سامنے آگیا۔
تفصیلات کے مطابق ذرائع نے بتایا کہ پاکستان پیپلز پارٹی نے وفاقی بجٹ سے متعلق مطالبات حکومت کے سامنے رکھ دیے ہیں، پی پی نے حکومت سے عوام اور مزدور دوست بجٹ دینے کا مطالبہ کیا ہے۔
ذرائع نے کہا کہ پی پی نے بجٹ میں پارلیمنٹیرینز کیلئے ترقیاتی اسکیمیں کم سے کم رکھنے کا تقاضہ کیا ہے، پیپلزپارٹی نے بلواسطہ، بلاواسطہ ٹیکسز کی شرح کم سے کم رکھنے کا بھی کہا ہے۔
پی پی نے بجٹ میں صنعتوں کیلئے ریلیف پیکج متعارف کرانے کی تجویز دی ہے، پی پی نے آمدن بڑھانے کیلئے نئے ٹیکسز کے بجائے ٹیکس نیٹ وسیع کرنے کا مطالبہ کیا ہے۔
ذرائع نے بتایا کہ پی پی نے بجٹ میں برآمدی شعبے کیلئے ریلیف پیکج متعارف کرانے کا پُرزور تقاضہ کیا ہے، پیپلزپارٹی نے حکومت کو اداروں کی نجکاری کی بھرپور مخالفت کا پیغام دے دیا ہے۔
