نائب وزیراعظم اسحاق ڈار نے کہا ہے کہ پاکستان کا مستقبل روشن ہے جس پر مجھے ایمان ہے، مسائل پر قابو پالیں گے۔
راولپنڈی چیمبر آف کامرس اینڈ انڈسٹری کی تقریب سے خطاب کرتے ہوئے نائب وزیراعظم اور وزیرخارجہ اسحاق ڈار کا کہنا تھا کہ مجھے پورا یقین ہے کہ مسائل پر قابو پالیں گے، جب بھی پاکستان ٹیک آف کرتا ہے کوئی خفیہ ہاتھ واپس کھینچ کر گرا دیتا ہے۔
اسحاق ڈار کا کہنا تھا کہ 4 بار وزیرخزانہ رہا، بورڈ آف انویسٹمنٹ کی بنیاد رکھی، ایٹمی دھماکوں کے وقت دنیا بھر کا پریشر پاکستان پر تھا، دنیا بھر سے ایٹمی دھماکے نہ کرنے کا پریشر ڈالا گیا تھا، امریکی حکام کو کہا کہ پاکستان کے مفاد میں ہم ایٹمی دھماکے کریں گے۔
نائب وزیراعظم کا کہنا تھا کہ وزیراعظم نوازشریف نے تاریخی فیصلہ لے کرملک کو ایٹمی قوت بنایا، ہمیں پتا تھا دنیا ہمیں ایٹمی دھماکے کرنے کی سزا دے گی۔
انھوں نے کہا کہ پابندیوں کے باوجود ہم نے ملک میں کسی چیز کی کمی نہ ہونے دی، کارگل ہوا اور اس کے بعد وزیراعظم کو ہائی جیکر قرار دیا گیا۔
وزیر خارجہ کا مزید کہنا تھا کہ 2013 کے شروع میں کہا جاتا تھا کہ پاکستان ڈیفالٹ کرجائے گا، 2013 میں کہا جارہا تھا جس کی بھی حکومت آئے ملک ڈیفالٹ ہوگا۔
نائب وزیراعظم اسحاق ڈار نے کہا پاکستان کے عوام نے ہمیں موقع دیا، 2013 میں حکومت بنائی، پاکستان کو 3سال میں اپنے پیروں پر کھڑا کیا مسائل سے نکالا۔
