کراچی: میئرمرتضیٰ وہاب نے کہا ہے کہ شہر کی سڑکوں کی دھلائی کلورین سے کی جا رہی ہے، عرق گلاب کا اسپرے بھی کیا جارہا ہے۔
تفصیلات کے مطابق شہرِ قائد کے میئر مرتضیٰ وہاب کا کہنا تھا کہ عیدالاضحیٰ پر قربانی کے بعد کراچی کی سڑکوں کو کلورین سے دھویا جارہا ہے جبکہ دھلائی کے بعد عرق گلاب اور مچھر مار اسپرے کیے جارہے ہیں۔
پہلے مرحلے میں سڑکوں کی کلورین سے دھلائی 99 کلیکشن پوائنٹس پر کی جائے گی، 99 کلیکشن پوائنٹس کی دھلائی کے بعد وہاں عرق گلاب اور مچھر مار اسپرے بھی ہوگا۔
میئر نے مزید بتایا کہ شہر میں اب تک 1 لاکھ 2 ہزار آلائشیں اٹھائی جاچکی ہیں، آلائشیں اٹھانے کا آپریشن 5 ویں روز تک جاری رہےگا۔
خیال رہے کہ ملک بھر میں عیدالاضحیٰ مذہبی جوش وجذبے کے ساتھ منائی گئی اور آج تیسرے روز بھی مسلمانوں نے اللہ کی راہ میں جانوروں کی قربانی پیش کی۔
لاہور، اسلام آباد، کراچی، پشاور، کوئٹہ، آزاد کشمیر، گلگت بلتستان سمیت شہر، قصبوں اور دیہات میں گائے، بیل، بکرے، اونٹ اور دنبے ذبح کیے گئے۔
دوسری جانب قربانی کے بعد کہیں آلائشیں بروقت اٹھائی گئیں اور کہیں رہائشی علاقوں اور سڑکوں پر آلائشیں پڑی نظر آئیں جس کے باعث تعفن پیدا ہونے سے لوگوں کو مشکلات کا سامنا کرنا پڑا۔