سعودی عرب میں رواں حج سیزن کے دوران شدید گرمی سے جاں بحق ہونے والے حجاج کی تعداد 900 سے تجاوز کر گئی ہے۔
تفصیلات کے مطابق ایام تشریق کا اختتام ہوتے ہی حجاج کرام کی واپسی کا سلسلہ شروع ہوگیا، مکہ مکرمہ میں رواں حج سیزن کے دوران گرمی سے تقریباََ 900 سے زائد عازمین حج جاں بحق ہوئے۔
رپورٹ میں بتایا گیا ہے کہ 922 مرنے والوں میں سے 68 ہلاکتیں ہندوستان سے تھیں، جن کی تعداد میں مزید اضافہ ہو گا۔
پاکستان نے حج کے لیے سعودی عرب جانے والے 35 عازمین کی اموات کی تصدیق کی ہے۔
پاکستان کے حج مشن کے ڈائریکٹر جنرل (ڈی جی) عبد الوہاب سومرو نے ایک بیان میں کہا ہے کہ 18 جون تک کی رپورٹ کے مطابق مجموعی طور پر 35 پاکستانیوں کی اموات ہوئی ہیں, مکہ میں 20 اور مدینہ میں چھ اموات ہوئی ہیں۔ ان کے بقول منیٰ میں چار، عرفات میں تین اور مزدلفہ میں دو اموات ہوئی تھیں۔
غیر ملکی خبر ایجنسی کے مطابق گرمی سے جاں بحق حاجیوں میں سے 600 کا تعلق مصرسے ہے، جبکہ 144 کا تعلق انڈونیشیا سے ہے۔
اردن کے ساٹھ اور تیونس کے پینتیس حاجی جاں بحق ہوئے، جبکہ دوران حج گرمی سے ایران کے گیارہ اور سینیگال کے تین حاجی جاں بحق ہوئے۔
پیر کے روزمکہ مکرمہ میں درجہ حرارت 51.8 ڈگری سینٹی گریڈ تک ریکارڈ ہوا تھا۔
دریں اثنا سعودی عرب کی وزارت صحت نے گرمی سے ہونے والی کسی بھی ہلاکت کی تردید کی ہے۔
وزارت نے پیر (17 جون) کو بتایا تھا کہ اس سال حاجیوں میں گرمی سے متعلق کوئی خاص اموات نہیں ہوئیں۔
روئٹرز نے وزارت صحت کے ایک اہلکار جمیل ابوالینین کا حوالہ دیتے ہوئے کہا کہ حجاج کرام میں صحت کی مختلف حالتوں اور پہلے سے موجود بیماریوں کو موت کی وجہ قرار دیا۔
گزشتہ سال 200 سے زائد عازمین جن میں سے زیادہ تر انڈونیشیا سے تھے، ہلاک ہوئے تھے۔
