اسلام آباد : چیئرمین پی پی بلاول بھٹو سے وزیر اعظم کی ملاقات نتیجہ خیز نہیں رہی ، ملاقات میں وزیراعظم کو بجٹ پرتعاون کی یقین دہانی نہیں کرائی۔
تفصیلات کے مطابق وزیراعظم شہباز شریف پیپلز پارٹی چیئرمین بلاول بھٹو کے تحفظات دور کرنے میں ناکام رہے۔
پیپلز پارٹی کے ذرائع نے بتایا کہ بلاول بھٹو زرداری سے وزیر اعظم کی ملاقات نتیجہ خیز نہیں رہی، پی پی نے وزیراعظم کو بجٹ پرتعاون کی یقین دہانی نہیں کرائی اور حکومت کی غیر مشروط حمایت سے معذرت کرلی۔
ذرائع کا کہنا ہے کہ پی پی نے مطالبات منظوری تک کسی یقین دہانی کرانے سےمعذرت کرلی اور حکومت کو بجٹ اجلاس میں شرکت کی یقین دہانی نہیں کرائی گئی۔
ذرائع نے مزید بتایا کہ حکومت نے پی پی سے بجٹ پاس کرانےمیں تعاون کی درخواست کی تھی ، جس پر پیپلز پارٹی نے حکومت سے تحریری معاہدے پرعملدرآمد کا مطالبہ کیا تاہم حکومت نے پیپلزپارٹی کو مطالبات منظوری پرڈیڈ لائن نہیں دی۔
پی پی کا کہنا ہے کہ ملکی وسیع تر مفاد اتحادی حکومت کے ساتھ چلنے پر مجبور ہیں، پیپلزپارٹی مذاکرات پر یقین رکھتی ہے، آئندہ بھی ملاقاتیں ہوں گی۔
پی پی ذرائع نے مزید کہا کہ کسی کو بلیک میل نہیں کر رہے، ، مہذب انداز میں اپنے تحفظات وزیر اعظم کو بتائے ہیں، وفاقی بجٹ پر تحفظات ہیں، سندھ کے منصوبوں کو نظرانداز کیا گیا ہے، جس پر وزیر اعظم یقین دلایا ہے سندھ کو حصے فنڈز جلد فراہم کریں گے۔
ذرائع کے مطابق وفاقی بجٹ تحفظات و خدشات سے صدر مملکت آصف علی زرداری کو آگاہ کردیا گیا اور پیپلز پارٹی نے آئندہ سی ای سی اجلاس میں وفاقی حکومت کے رویے کا تفصیلی جائزہ لینے کا فیصلہ کیا ہے۔
ترجمان پی پی شازیہ مری نے اے آر وائی سے گفتگو میں تصدیق کی کہ وزیر اعظم شہباز شریف سے ملاقات میں نتیجہ خیز کوئی بات نہیں ہوئی۔
