کراچی: شہر قائد میں رات کے وقت 100 فی صد بلنگ والے علاقوں میں بھی غیر علانیہ لوڈ شیڈنگ شروع ہو گئی۔
تفصیلات کے مطابق کراچی کے مختلف علاقوں میں رات کے وقت بجلی کی غیر علانیہ لوڈ شیڈنگ کی جا رہی ہے، 100 فی صد بلنگ والے علاقوں میں بھی بجلی کی غیر علانیہ بندش کا سلسلہ شروع ہو گیا ہے۔
کھوکھرا پار، احسن آباد، ریلوے سوسائٹی، شاہ فیصل ٹاؤن، طارق بن زیاد سوسائٹی، خواجہ اجمیر نگری، شاہ نواز بھٹو کالونی، ٹاور، سرجانی، گڈاپ، کاٹھور، تیسر ٹاؤن، منظور کالونی، سائٹ بلدیہ، میٹروول اور کورنگی کے مختلف علاقوں میں رات کے اوقات میں لوڈشیڈنگ کی جا رہی ہے۔
ذرائع کا کہنا ہے کہ گرمی میں اضافے کی وجہ سے سسٹم پر لوڈ بڑھنے سے غیر علانیہ لوڈ شیڈنگ کی جا رہی ہے۔
لیاری، کیماڑی کے مختلف علاقوں میں بجلی کی فراہمی معطل ہے، سرجانی، گذری، اللہ والا ٹاؤن میں 10 گھنٹے سے زائد کی لوڈشیڈنگ کی جا رہی ہے، میمن گوٹھ ملیر، نارتھ کراچی، قیوم آباد، شادمان ٹاؤن، عباس ٹاؤن، علی ٹاؤن، عبداللہ گوٹھ، پالاری گوٹھ، اے ون سٹی میں بھی لوڈشیڈنگ ہو رہی ہے۔
کراچی کے علاقے بفر زون میں بجلی کی مسلسل بندش سے تنگ آ کر علاقہ مکینوں نے احتجاج کیا، مظاہرین نے اطراف کی سڑکوں کو ٹینکر لگا کر بند کر دیا، سڑک بندش سے گاڑیوں کی لمبی قطاریں لگ گئیں، مظاہرین کا کہنا تھا کہ 16 سے 18 گھنٹے کی لوڈ شیڈنگ کی جا رہی ہے۔
