فیصل آباد کے علاقے شریف پورہ میں گھر میں آگ لگنے سے جھلسنے والی 52 سالہ فرحت اور اس کی پانچ سالہ پوتی ایمان فاطمہ بھی الائیڈ اسپتال میں دم توڑ گئیں۔
تفصیلات کے مطابق شریف پورہ میں 8 جون کو لیپ ٹاپ کی اسپارکنگ سے کمرے میں جمع گیس کے باعث آگ لگنے سے پانچ بچوں سمیت نو افراد جھلس گئے تھے جن میں سے گزشتہ روز تک سات افراد جان کی بازی ہار گئے تھے۔
فیصل آباد : لیپ ٹاپ پھٹنے سے گھر میں آتشزدگی ، جاں بحق افراد کی تعداد 7 ہوگئی
اب اس واقعے میں رات گئے الائیڈ اسپتال کے برن وارڈ میں زیر علاج پانچ سالہ ایمان فاطمہ اور اس کی دادی 52 سالہ فرحت بھی دم توڑ گئیں، جس کے بعد ایک ہی خاندان کے جاں بحق ہونے والے افراد کی تعداد 9 ہو گئی۔
سانحے میں جھلسنے والے تمام نو افراد جاں بحق ہو چکے ہیں، ننھی ایمان فاطمہ کی والدہ راشدہ، 8 سالہ بھائی ریحان اور چچا مکی رضا گزشتہ روز جاں بحق ہو گئے تھے جبکہ اس سے قبل راشدہ کی جیٹھانی نرگس، نرگس کی 6 سالہ بیٹی دعا فاطمہ، 3 سالہ بیٹا ابراہیم اور 9 سالہ بیٹا طٰحہ جاں بحق ہوئے تھے۔
یاد رہے 18 جون کو رہائشی محمداحمد کے گھر میں اسپارکنگ کی وجہ سے لیپ ٹاپ پھٹنے سے لگنے والی آگ مبینہ طور پر اے سی کی گیس لیکج کے باعث کمرے میں پھیل گئی تھی۔
جس کے نتیجے میں وہاں سوئے چار بچوں سمیت نو افراد جھلس کر زخمی ہوگئے تھے، متاثرین کو الائیڈ اسپتال کے برن وارڈ منتقل کیا گیا تھا۔
