پشاور : وزیراعلٰی کے پی علی امین گنڈا پور آپریشن عزم استحکام کے معاملے پر آج بانی پی ٹی آئی سے سے ہدایات لیں گے۔
تفصیلات کے مطابق وزیر اعلی خیبر پختونخوا علی امین گنڈا پور بانی پی ٹی آئی سے آج اڈیالہ جیل میں ملاقات کریں گے۔
ذرائع نے بتایا ہے کہ وزیر اعلیٰ عزم استحکام آپریشن پر بانی پی ٹی آئی سے ہدایات لیں گے، جس کے بعد پختونخوا ہاؤس اسلام آباد میں ممبران قومی اسمبلی سے بھی ملاقات کریں گے اور پارلیمانی لیڈرز کو اعتماد میں لیں گے۔
پی ٹی آئی مرکزی قیادت نےآپریشن پراعتماد میں نہ لینے پر قومی اسمبلی میں احتجاج کیا تھا۔
یاد رہے پی ٹی آئی نے خیبرپختونخوا میں ممکنہ آپریشن کی شدید مخالفت کا فیصلہ کرتے ہوئے آپریشن عزم استحکام پر پارلیمنٹ کو اعتماد میں لینے کا مطالبہ کیا ہے۔
چیئرمین پی ٹی آئی بیرسٹرگوہرعلی خان کا کہنا تھا کہ کوئی بھی آپریشن ہو، اس پر ایوان کو اعتماد میں لیا جائے۔ ان کیمرہ بریفنگ دی جائے۔
قومی اسمبلی میں خطاب کرتے ہوئے کہا تھا کوئی کمیٹی جتنی بھی بڑی ہو اس ایوان سے بڑی نہیں ہوسکتی، وفاقی حکومت نے کسی بھی مسئلے پر پارلیمان کو اعتماد میں نہیں لیا۔
یاد رہے نیشنل ایکشن پلان کی اپیکس کمیٹی نے ملک میں جاری دہشتگردی کے خلاف عزم استحکام آپریشن شروع کرنے کی منظوری دی تھی۔
