ذیابیطس یعنی شوگر ایک ایسا مرض ہے جو انسانی جسم کو خاموشی سے اندر ہی اندر کھوکھلا کرکے مختلف امراض میں مبتلا کرنے کا سبب بن جاتا ہے۔
عام طور پر مرض میں مبتلا لوگ احتیاطاً میٹھی اشیاء سے مکمل پرہیز کرتے ہیں جو کافی ضد تک درست ہے لیکن کم از کم چائے کے معاملے میں تھوڑی نرمی برتی جاسکتی ہے۔
ذیابیطس کے مریض چائے کے معاملے میں بہت احتیاط سے کام لیتے ہیں، ایسے میں یہ جاننا ضروری ہے کہ شوگر کے مریض کو کس طرح کی چائے پینی چاہیے۔
اس حوالے سے اے آر وائی نیوز کے پروگرام باخبر سویرا میں ماہر ذیابیطس ڈاکٹر ایم عباسی اور ڈاکٹر سونیا بختیار نے مریضوں کو اہم مشورے دیے۔
انہوں نے بتایا کہ ذیابیطس کے مریضوں کو چاہیے کہ وہ دودھ سے بنی چینی والی چائے پینے سے گریز کریں کیونکہ شکر جسم میں شوگر لیول کو بڑھا سکتی ہے کیونکہ دونوں کا مرکب نقصان دہ ثابت ہو سکتا ہے۔
ماہرین کے مطابق ذیابیطس کے مریض اگر چائے سے پرہیز نہیں کر سکتے تو انہیں ہربل چائے پینا چاہیے کیونکہ اس سے نقصان کا خطرہ نہیں ہوتا۔
جڑی بوٹیوں والی چائے میں کیلشیم، پوٹاشیم، میگنیشیم اور وٹامن اے کے ساتھ ساتھ اینٹی آکسیڈنٹس، اینٹی انفلامیٹری اور اینٹی مائکروبیل پائے جاتے ہیں جو ذیابیطس میں فائدہ مند ہیں۔
سبز چائے وزن میں کمی کے لیے بڑے پیمانے پر استعمال کی جاتی ہے، اس چائے میں اینٹی آکسیڈینٹ اور متعدد خصوصیات موجود ہوتی ہیں جو آپ کی صحت کے لیے مختلف طریقوں سے فائدہ مند ثابت ہوسکتی ہیں اور سبز چائے پینا بلڈ شوگر کی صحت مند سطح کو برقرار رکھنے میں معاون ہے۔
