بے زبان جانوروں کے ساتھ ظالمانہ سلوک کا ایک اور واقعہ سامنے آیا ہے جس میں بااثر افراد نے غریب کاشتکار کی گدھی کو فائرنگ کر کے ہلاک کر دیا۔
یہ واقعہ جڑواں شہر راولپنڈی کے علاقے چکری مکھیال میں پیش آیا ہے جہاں درخت کاٹنے سے منع کرنے پر بااثر ملزمان نے یہ وحشیانہ قدم اٹھایا۔
رپوٹ کے مطابق بااثر ملزمان درخت کاٹ رہے تھے کہ علاقے کے ایک کاشتکار نے انہیں ایسا کرنے سے روکا جس پر وہ آپے سے باہر ہوگئے اور فائرنگ کر کے اس غریب کی گدھی کو ہلاک کر دیا۔
پولیس نے گدھی کے مالک کی درخواست پر تھانہ چکری میں 11 ملزمان کے خلاف مقدمہ درج کر کے ان کی گرفتاری کی کوششیں شروع کر دی ہیں۔
ایف آئی آر میں محمد نواز، ثقلین، صفدر اور شکیل کے ساتھ 7 نامعلوم افراد کو نامزد کیا گیا ہے۔
واضح رہے کہ پاکستان کے مختلف علاقوں میں جانوروں پر تشدد اور انہیں ہلاک کیے جانے کے واقعات میں حالیہ چند ہفتوں میں اضافہ دیکھنے میں آیا ہے۔
سانگھڑ میں با اثر کی جانب سے اونٹنی کی ٹانگ کاٹے جانے کے بعد حیدرآباد میں گدھے کی ٹانگ توڑنے کا واقعہ ہوا جو بعد ازاں ہلاک ہوگیا، اس کے بعد پنڈی میں گدھی کے کان کاٹنے کی واردات ہوئی۔
گزشتہ دنوں عمر کوٹ میں ایک اونٹنی کو چاروں ٹانگیں کاٹ کر مار دیا گیا جب کہ دو روز قبل سرگودھا میں ذاتی دشمنی پر بااثر افراد نے غریب کاشتکار کے مویشیوں کو زندہ جلا کر مار ڈالا۔
