کراچی کے علاقے لیاقت آباد میں لوڈ شیڈنگ سے تنگ عوام نے کے الیکٹرک آفس پر حملہ کردیا جبکہ لوگوں نے گاڑیوں کو بھی نقصان پہنچایا۔
تفصیلات کے مطابق ان دنوں کراچی میں بدترین لوڈشیڈنگ سے عوام تنگ ہیں، ایسے میں لیاقت آباد کی عوام کے صبر کا پیمانہ لبیرز ہوگیا اور مشتعل افراد نے کے الیکٹرک آفس پر حملہ کردیا، لوڈ شیڈنگ کے ستائے عوام نے وہاں کھڑی گاڑیوں پر بھی اپنی بھڑاس نکالی۔
اپنے موقف میں ترجمان کےالیکٹرک نے کہا کہ کے الیکٹرک دفتر پر حملے اور گاڑیوں کو نقصان پہنچانے کی شدید مذمت کرتے ہیں۔
ترجمان نے کہا کہ شرپسند عناصر کیخلاف سخت قانونی کارروائی کو یقینی بنایا جائے، ایف سی ایریا اور الکرم اسکوائر میں بجلی کی فراہمی معمول کے مطابق ہے، لوڈشیڈنگ کا دورانیہ علاقے میں بجلی چوری اور نقصانات کی شرح کے مطابق ہے۔
کے الیکٹرک ترجمان کا کہنا تھا کہ علاقہ مکین وقت پر بجلی کے بل کی ادائیگیوں کو یقینی بنائیں، وقت پر کی گئی ادائیگیاں علاقے کی لوڈشیڈنگ میں کمی یا خاتمے کا اہم جز ہیں۔