لاہور : لاہور ہائیکورٹ نے وفاقی حکومت کو بیرون ملک پناہ لینے والوں کو پاسپورٹ جاری کرنے پر پابندی کا معاملہ حل کرنے کی ہدایت کر دی۔
تفصیلات کے مطابق لاہور ہائیکورٹ کے جسٹس سلطان تنویر احمد نے شہری بلال حامد کی بیرون ملک پناہ لینے والوں کو پاسپورٹ جاری کرنے پر پابندی کیخلاف درخواست پر سماعت کی۔
جس میں پاسپورٹ جاری نہ کرنے کے حکومتی اقدام کو چیلنج کیا گیا، درخواست گزار کے وکیل رانا انتظار نے دلائل دیے کہ اُن کے موکل نے پاسپورٹ کے اجرا کیلئے درخواست دی لیکن حکومت پاسپورٹ نے جاری نہیں کیا، درخواست گزار کے خلاف کسی قسم کا کوئی مقدمہ نہیں ہے۔
وکیل نے استدعا کی کہ اسائلم لینے پر پاسپورٹ جاری نہ کرنے کا نوٹیفیکیشن کالعدم قرار دیا جائے، جس کے بعد عدالت نے ہدایت کی کہ وفاقی حکومت یہ معاملہ خود حل کرے اور اس بارے میں رپورٹ داخل کی جائے۔
عدالت نے قرار دیا کہ اگر حکومت معاملہ طے نہیں کرتی تو عدالت خود حکم جاری کرے گی۔
یاد رہے حکومت نے ملکی سلامتی اور سیکیورٹی کے تناظر میں اسائلم لینے والے پاکستانیوں کو پاسپورٹ جاری نہ کرنے کا فیصلہ کیا تھا۔
مراسلے میں کہنا تھا کہ ایسے تمام پاکستانی جو کسی بھی بنیاد پر دوسرے ممالک میں پناہ لیں گے، ان کو پاسپورٹ نہیں ملے گا اور ان کے پاسپورٹ منسوخ اور دوبارہ قابل تجدید نہیں ہوں گے۔
