اسلام آباد : محرم الحرام میں انٹرنیٹ کی بندش کے حوالے سے وزرات داخلہ کا اہم بیان سامنے آگیا۔
تفصیلات کے مطابق محرم الحرام کے دوران انٹرنیٹ کی بندش کے معاملے پر ترجمان وزرات داخلہ نے کہا ہے کہ محرم کے دوران انٹرنیٹ بند کرنے حوالے سے صوبوں کی درخواستوں پر وزارت داخلہ نے کوئی فیصلہ نہیں کیا، انٹرنیٹ بند کرنے یا نہ کرنے کا حتمی فیصلہ وزیراعظم کریں گے۔
ترجمان وزرات داخلہ نے واضح کیا کہ ابھی کسی صوبےکی درخواست نہ منظور کی نہ ہی مسترد کی۔
گذشتہ روز ذرائع نے کہا تھا کہ محرم الحرام میں سوشل میڈیا کی بندش کے حوالے سے پنجاب حکومت کی درخواست مسترد کردی گئی۔
مزید پڑھیں : محرم الحرام میں سوشل میڈیا ایپس بند ہوں گی یا نہیں؟ حکومت نے فیصلہ کرلیا
ذرائع نے بتایا تھا کہ فیس بک ،ٹک ٹاک ،واٹس اپ سمیت دیگرسوشل میڈیا ایپس بند نہیں ہوں گی اور محرم الحرام میں سیکیورٹی کو فل پروف بنایا جائے گا۔
وزارت داخلہ نے ہدایت کی تھی سیکیورٹی کو مزید فعال اور مؤثر بنایا جائے جبکہ موبائل سگنلز بھی ان جگہوں پر بند ہوں گے جہاں جلوس ،مجالس ہوں گی۔
یاد رہے مختلف صوبوں کی طرف سے 6 ایپلی کیشنز کو 6 تا11 محرم بند رکھنے کا کہا گیا تھا، محکمہ داخلہ پنجاب کی جانب سے کہا گیا تھا کہ محرم الحرم کی سیکیورٹی صورتحال کے پیش نظر ،سوشل میڈیا کے مختلف پلیٹ فارم 6 تا 11 محرم تک بند رہیں گے۔
