اسلام آباد: ہائیکورٹ نے ایم سی آئی کو ریڑھی بانوں کے خلاف سخت اقدامات سے روک دیا۔
تفصیلات کے مطابق اسلام آباد ہائیکورٹ کے جسٹس سردار اعجاز اسحاق خان نے میٹروپولیٹن کارپوریشن اسلام آباد کو ریڑھی بانوں کے خلاف سخت اقدامات سے روکنے کے لیے تحریری حکم نامہ جاری کر دیا۔
حکم نامے میں کہا گیا ہے کہ تمام فریقین کی جانب سے آئندہ سماعت پر معاملے سے متعلق معلومات رکھنے والے افسران عدالت پیش ہوں، اور اس دوران ریڑھی بانوں کے خلاف کسی قسم کے بھی سخت اقدامات سے اجتناب کیا جائے۔
حکم نامے میں کہا گیا کہ درخواست گزار وکیل کے مطابق ریڑھی بانوں کے لائسنسز کی تجدید نہیں کی جا رہی، کئی ریڑھی بانوں کو لائسنسز ہی جاری نہیں کیے جا رہے۔
عدالت نے کہا کہ وکیل کے مطابق احساس ریڑھی بان پروگرام کے تحت ریڑھی بانوں کو بینکوں کی طرف سے قرضہ دیا گیا تھا، ریڑھی بانوں کے لائسنسز کی تجدید نہ ہونے کے باعث وہ قرضہ واپس لوٹانے سے قاصر ہیں، بادی النظر میں کیس بنتا ہے، اس لیے درخواست سماعت کے لیے منظور کی جاتی ہے۔
عدالت نے کہا کہ کیس کو 8 جولائی کو آئندہ سماعت کے لیے مقرر کیا جائے۔
واضح رہے کہ اسلام آباد کے ریڑھی بانوں نے لائسنسز کے اجرا، ایم سی آئی کی جانب سے ہراساں کرنے کے خلاف اسلام اباد ہائیکورٹ سے رجوع کیا تھا، درخواست میں ایم سی آئی، سی ڈی اے، ضلعی انتظامیہ، حکومت اور آئی جی اسلام آباد کو فریق بنایا گیا تھا۔
