ہیوسٹن: سمندری طوفان بیرل نے امریکی ریاست ٹیکساس میں تباہی مچا دی ہے اور بجلی کا بحران پیدا کر دیا ہے، مختلف حادثات میں 8 افراد کی ہلاکتیں بھی رپورٹ کی گئی ہیں۔
غیر ملکی میڈیا رپورٹس کے مطابق امریکی ریاست ٹیکساس میں بجلی کا بحرا ن شدت اختیار کر گیا، سمندری طوفان بیرل کے سبب 30 لاکھ سے زائد افراد بجلی سے محروم ہیں۔ توانائی کی ضرورت پوری کرنے کے لیے ہیوسٹن کے گیس اسٹیشنز پر لوگوں کا رش لگ گیا، کئی گیس اسٹیشنز بند ہیں۔
سمندری طوفان بیرل کے نتیجے میں رونما ہونے والے مختلف حادثات میں آٹھ افراد ہلاک اور درجنوں زخمی ہو چکے ہیں۔
بیرل پہلے ایک ٹراپیکل طوفان تھا جس کے بعد وہ ’ڈپریشن‘ میں تبدیل ہوا، اور اب ایک پوسٹ ٹراپیکل سائیکلون میں تبدیل ہو چکا ہے، طوفان نے ریاست آرکنساس اور لوزیانا کو بھی متاثر کیا۔
شدید طوفانی بارشوں سے سڑکیں زیر آب آ گئیں، گاڑیاں ڈوب گئیں، تیز ہواوں سے درخت اکھڑ گئے، گھروں اور انفرا اسٹرکچر کو بھی نقصان پہنچا، طوفان بیرل سے ریاستیں میسوری، الینوائے، انڈیانا، ٹینیسی، اوہائیو اور مشی گن بھی متاثر ہونے کا امکان ہے۔ کیریبین میں بھی بڑی تباہی ہوئی، اور مختلف حادثات میں دس اموات رپورٹ ہوئیں۔
