لاہور: آصف زرداری کی زیرِصدارت ہونیوالے اجلاس میں پی پی رہنماؤں نے صدر مملکت سے پارٹی کارکنوں کے کام نہ ہونے کی شکایت کردی۔
صدر آصف زرداری کی زیرِصدارت پی پی رہنماؤں کے اجلاس کا احوال سامنے آگیا، ذرائع نے بتایا کہ پی پی رہنماؤں نے شکایت کی کہ پنجاب حکومت اور وفاقی حکومت تعاون نہیں کررہی ہے، پیپلزپارٹی رہنما نے اجلاس میں گفتگو کرتے ہوئے کہا کہ ہمیں ہمارا پورا حق نہیں دیا جارہا۔
ٹکٹ ہولڈرز نے بتایا کہ انتخابی حلقوں کے مسائل حل نہیں ہو رہے، پی پی رہنما کا کہنا تھا کہ ہم بھی ووٹ حاصل کرتے ہیں، ووٹرز کو مطمئن کرنا پڑتا ہے، آصف علی زرداری نے رہنماؤں کے مسائل کے حل کی یقین دہانی کرا دی۔
آصف زرداری نے اجلاس میں کہا کہ اب خود میدان میں آگیا ہوں، اسلام آباد ہو یا لاہور سب سے کام کرواؤں گا، کوئی سیاسی جماعت پیپلزپارٹی کے مقابلے کی نہیں۔
ذرائع کے مطابق صدر نے اظہار خیال کرتے ہوئے کہا کہ میری جماعت پر تنقید ہوتی ہے یہ میں ثواب سمجھتا ہوں، ن لیگ سے حکومت نہیں چل رہی، آصف زرداری نے پی پی پنجاب کی قیادت کو مل بیٹھ کر مسائل حل کرنے کی ہدایت کی۔
آصف زرداری نے کہا کہ آئی ایم ایف سے قرضے لیکر عوام کا امتحان لیا جارہا ہے، ایک سابق وزیراعظم جو میں میں کرتا تھا آج جیل میں بیٹھا ہے، حکومت بنانا بھی جانتے ہیں گرانا بھی، عوام کو تنہا نہیں چھوڑیں گے۔
انھوں نے کہا کہ پیپلز پارٹی کارکن تیار ہو جائیں ابھی بہت کام کرنا ہے، ڈرائنگ روم کی سیاست نہیں کرنی باہر نکلنا ہے۔
صدر مملک آصف زرداری کا کہنا تھا کہ پیپلز پارٹی کی تنظیم میں نوجوانوں کو آگے لایا جائے، صدر نے پیپلز پارٹی کی تنظیم سازی کی رپورٹ طلب کرلی ہے۔
