اسلام آباد: وزیر اطلاعات و بلدیات سندھ شرجیل انعام میمن کا کہنا ہے کہ سندھ حکومت نے سانحہ ٹمبر مارکیٹ کے متاثرین سے کیا گیا پہلا وعدہ پورا کردیا ہے۔
کراچی میں میڈیا سے گفتگو کرتے ہوئے شرجیل انعام میمن کا کہنا تھا کہ سانحہ ٹمبر مارکیٹ کے نوے متاثرین کو روزمرہ کے استعمال کے لئے فی کس ایک لاکھ روپے کا چیک ادا کردیا گیا ہے۔ متاثرین کو کوائف اور تخمینے کی رپورٹ ملنے کے فوری بعد امدادی رقم فراہم کردی جائے گی۔
انہوں نے کہا کہ شہر قائد میں آبادی کے تناسب سے فائر ٹینڈرز اور اسنارکل کی کمی کا سامنا ہے۔ وزیر اعلیٰ سندھ کی جانب سے فائر ٹینڈرز اور دیگر آلات کی خریداری کے لئے سوا تین ارب روپے کی رقم فراہم کی گئی ہے، خریداری کے لئے تمام انتظامات مکمل ہیں لیکن عدالت کے حکم امتناعی کے باعث مشکلات کا سامنا ہے۔
