اسلام آباد : اسلام آباد ہائیکورٹ نے بانی پی ٹی آئی کو وکلاء سے ملاقات کیلئے عدالت طلبی کا عندیہ دے دیا۔
تفصیلات کے مطابق سلام آباد ہائیکورٹ نے بانی پی ٹی آئی کی وکلاء سے ملاقات کی اجازت کی درخواست پر سماعت کا تحریری حکمنامہ جاری کردیا۔
اسلام آباد ہائیکورٹ کے جسٹس سردار اعجاز اسحاق خان نے حکمنامہ جاری کیا، جس میں کہاہے کہ جیل حکام ریکارڈ پیش کریں کہ عدالتی حکم کے بعد تحریک انصاف کے بانی کی وکلاء سے کتنی ملاقاتیں ہوئیں، سپریٹنڈنٹ جیل کسی دوسری جگہ کی تجویز دیں جہاں تحریک انصاف کے بانی کو وکلاء سے مشاورت کر سکیں۔
عدالت نے ہدایت دی کہ جیل حکام یقینی بنائیں کہ آئندہ تحریک انصاف کے بانی کی وکلاء سے ملاقات میں کوئی مسائل نہیں ہوں گے۔
اسلام آباد ہائی کورٹ نے کہا کہ اگر جیل حکام عدالت کو قائل نہ کر سکے تو تحریک انصاف کے بانی کو اسلام آباد ہائیکورٹ میں پیش کرنے کا حکم دیں گے۔
تحریری حکمنامے میں کہا گیا کہ رجسٹرار آفس اسلام آباد ہائیکورٹ میں جگہ کا تعین کریں جہاں تحریک انصاف کے بانی کو ہفتے میں تین بار وکلاء سے ملاقات کیلئے پیش کرنے کی ہدایت دی جائے۔
