کراچی میں خطرناک وائرس نیگلیریا نے لانڈھی بھینس کالونی کے رہائشی نوجوان کی جان لے لی جس کے بعد رواں ماہ ہلاکتیں کی تعداد 3 ہوگئی۔
22 سالہ اورنگزیب 7 جولائی کو اپنے دوستوں کے ہمراہ پکنک پر قائد آباد کے ایک فارم ہاؤس پر گیا تھا جہاں وہ سوئمنگ پول میں نہائے تھے۔
محکمہ صحت کے ترجمان نے بتایا کہ 8 جولائی کو اورنگزیب کو بخار، سر درد اور الٹیوں کی شکایات ہوئیں جس کے بعد 10 جولائی کو اسے جناح اسپتال کی ایمرجنسی میں لایا گیا تھا۔
ترجمان نے بتایا کہ 11 جولائی کو مریض میں نیگلیریا وائرس کی تصدیق ہوئی، متوفی نوجوان لانڈھی بھینس کالونی کا رہائشی تھا، نوجوان کی ہلاکت نیگلیریا وائرس سے ہوئی ہے۔
محکمہ صحت نے بتایا کہ رواں سال نیگلیریا وائرس کے 3 کیس رپورٹ ہوئے، ایک کیس کورنگی، دوسرا ملیر اور تیسرا حیدر آباد سے رپورٹ ہوا تھا، تینوں مریضوں کی ہلاکت جولائی میں ہوئی۔
نگلیریا وائرس کیا ہے؟
نگلیریا ایک ایسا امیبا ہے جو اگر ناک کے ذریعے جسم میں داخل ہو جائے تو دماغ کو پوری طرح چاٹ جاتا ہے جس سے انسان کی موت واقع ہو جاتی ہے۔ یہ عموماً گرم پانی میں تیزی سے پرورش پاتا ہے۔
یہ وائرس عموماً سوئمنگ پولز اور تالاب سمیت ٹینکوں میں موجود ایسے پانی میں پیدا ہوتا ہے جس میں کلورین کی مقدار کم ہوتی ہے۔ شدید گرمی بھی نگلیریا کی افزائش کا سبب بنتی ہے۔
طبی ماہرین نگلیریا کو خاموش قاتل قرار دیتے ہیں کیونکہ اس نے اب تک دنیا میں ہزاروں افراد کو ابدی نیند سلا دیا ہے۔
