سابق امریکی صدر ڈونلڈ ٹرمپ پر پینسلوینیا میں ریلی کے دوران حملے کی ویڈیو سے نئے شواہد سامنے آ گئے ہیں۔
ویڈیو میں سیکرٹ سروس کے اسنائپر کو دیکھا جا سکتا ہے جنھوں نے پہلے ہی شوٹر پر نشانہ باندھ رکھا تھا مگر گولی نہیں چلائی، اور اسنائپرز سے پہلے شوٹر نے فائر کر دیے۔
جوابی کارروائی میں جب پولیس اہلکاروں نے فائرنگ کی تو 20 سالہ نوجوان حملہ آور تھامس میتھیو کروکس ہلاک ہو گیا، اس واقعے کی دوسری ویڈیو میں شوٹر نظر آ رہا ہے جس کی جانب سے گولیاں چلانے پر لوگوں کے چیخنے کی آوازیں بھی سنائی دے رہی ہیں۔
ٹرمپ پر حملے کی ویڈیو سامنے آ گئی
ڈونلڈ ٹرمپ پر قاتلانہ حملہ کرنے والے شوٹر کی سوشل میڈیا پر ایک ویڈیو بھی سامنے آ گئی ہے، ویڈیو میں تھامس میتھیو کروکس کہہ رہا ہے کہ اسے ٹرمپ اور ریپبلکین سے نفرت ہے۔
امریکی میڈیا کے مطابق تھامس میتھیو کروکس بیتھل پارک کے علاقے کا رہائشی تھا، اس نے 2022 میں ہائی اسکول سے گریجویشن کیا، ووٹرز ڈیٹا بیس کے مطابق تھامس میتھیو کروکس کو ریپبلکن کے طور پر ووٹ دینے کے لیے رجسٹر کیا گیا تھا، لیکن تھامس نے ڈیموکریٹک پارٹی کے لیے 15 ڈالر چندہ بھی دیا تھا۔
