پاکستان اگلے سال چیمپئنز ٹرافی کا دفاعی چیمپئن ہونے کے ساتھ میزبان بھی ہے تاہم سابق بھارتی کرکٹر نے بلیو شرٹس کی شرکت کے حوالے سے زہر اگل دیا۔
آئی سی سی چیمپئنز ٹرافی آئندہ سال فروری مارچ میں پاکستان میں منعقد ہوگی۔ پاکستان اس ایونٹ کا میزبان ہونے کے ساتھ دفاعی چیمپئن بھی ہے۔
اس شوپیس ایونٹ میں 6 ٹیمیں شرکت کی یقین دہانی کراچکی ہیں تاہم بھارت کی جانب سے روایتی حربے استعمال کیے جا رہے ہیں اور اب سابق بھارتی کرکٹر ہربھجن سنگھ نے بھی اس حوالے سے زہر اگل دیا ہے۔
ہربھجن سنگھ نے اپنے سوشل میڈیا پیغام میں کہا ہے کہ اگر ہمارے کھلاڑی پاکستان میں محفوظ نہیں ہیں تو ہم ٹیم نہیں بھیجیں گے۔ اگر آپ کھیلنا چاہتے ہیں تو کھیلو، اگر نہیں تو نہ کھیلو۔
سابق بھارتی کرکٹر نے مزید ہرزہ سرائی کرتے ہوئے کہا کہ ’ہندوستانی کرکٹ پاکستان کے بغیر بھی زندہ رہ سکتی ہے، اگر تم لوگ ہندوستانی کرکٹ کے بغیر بھی زندہ رہ سکتے ہو، تو کر لو۔‘
ادھر پاکستان کرکٹ بورڈ واضح کرچکا ہے کہ چیمپئنز ٹرافی پاکستان میں ہی ہوگی اور اس کا کوئی نیوٹرل وینیو نہیں ہوگا۔
دوسری جانب بھارتی میڈیا نے دعویٰ کیا ہے کہ بلیو شرٹس شوپیس ایونٹ کے لیے پاکستان نہیں جائیں گے بلکہ بی سی سی آئی نے اپنے میچز سری لنکا یا یو اے ای منتقل کرنے کے لیے آئی سی سی کو درخواست دے دی ہے۔
واضح رہے کہ بھارت نے آخری بار 2008 میں پاکستان کا دورہ کیا تھا اور دونوں کے درمیان 10 سال قبل آخری باہمی سیریز ہوئی تھی جس کے بعد سے دونوں ٹیمیں آئی سی سی یا اے سی سی ایونٹس میں تو ایک دوسرے کے مدمقابل ہوتی ہیں لیکن باہمی سیریز نہیں کھیل پاتیں۔
