واشنگٹن: امریکا نے پاکستان تحریک انصاف (پی ٹی آئی) کے دفاتر پر چھاپوں اور پارٹی ترجمان رؤف حسن کی گرفتاری پر اپنے ردعمل کا اظہار کر دیا۔
امریکی محکمہ خارجہ کے ترجمان میتھیو ملر نے پریس کانفرنس میں کہا کہ بحیثیت ترجمان جب کسی ترجمان کی گرفتاری دیکھتا ہوں تو ذاتی طور پر پریشان ہوتا ہوں، جب ہم اپوزیشن رہنماؤں کی گرفتاریوں کو دیکھتے ہیں تو ہمیشہ پریشان ہوتے ہیں۔
میتھیو ملر نے کہا کہ پاکستان میں قانون کی حکمرانی اور اس کے تحت مساوی انصاف دیکھنا چاہتے ہیں، پاکستان میں آزادی اظہار اور پُرامن اجتماع جیسے انسانی حقوق کے احترام کی حمایت کرتے ہیں، زور دیتے ہیں کہ ان اصولوں کا پاکستان کے آئین و قوانین کے مطابق احترام کیا جائے۔
ترجمان سے افغان مہاجرین کی پاکستان میں ایک سال کی توسیع سے متعلق حکومتی فیصلے پر سوال کیا گیا تو ان کا جواب تھا کہ اس بارے میں آپ کو بعد میں جواب دوں گا۔
پریس کانفرنس میں میتھیو ملر سے سوال کیا گیا کہ اسرائیلی وزیر اعظم نیتن یاہو کے کانگریس سے خطاب پر مظاہروں کا اعلان کیا گیا، کل واشنگٹن میں نیتن یاہو مخالف اور حامی مظاہرین میں جھگڑوں کا امکان ہے؟
میتھیو ملر نے کہا کہ ہم سمجھتے ہیں تمام احتجاج پُرامن طریقے سے ہونے چاہئیں، ہم امریکیوں کے احتجاج کے حق کی حمایت کرتے ہیں، یہ ان چیزوں میں سے ہے جو امریکا کو عظیم اور ہماری جمہوریت کو مضبوط بناتی ہے۔
انہوں نے کہا کہ مظاہروں سے لوگ اپنے ذہن کی بات کرتے ہیں، تمام احتجاج کسی بھی صورت میں پُرامن رہنا چاہیے۔
