اسلام آباد : چیف جسٹس آف پاکستان فائزعیسیٰ کو دھمکی پر ٹی ایل پی کے نائب امیر سمیت 1500 کارکنوں پرمقدمہ درج کرلیا گیا۔
تفصیلات کے مطابق چیف جسٹس آف پاکستان فائزعیسیٰ کو قتل کی دھمکی دینے کے معاملے پر ٹی ایل پی کے نائب امیر کے خلاف مقدمہ درج کرلیا گیا۔
ٹی ایل پی کے نائب امیر پیرظہیرالحسن شاہ کے خلاف تھانہ قلعہ گجرسنگھ میں تھانیدار حماد حسین کی مدعیت میں مقدمہ درج کیا گیا۔
جس میں ٹی ایل پی کے پندرہ سو کارکنوں کو بھی نامزد کیا گیا ہے، مقدمے میں انسداد دہشتگردی ایکٹ، مذہبی منافرت، فساد پھیلانے، عدلیہ پردباؤ ڈالنے، اعلیٰ عدلیہ کودھمکی، کارسرکار میں مداخلت اور قانونی فرائض میں رکاوٹ ڈالنے کی دفعات شامل کی گئی ہیں۔
ایف آئی آر کے مطابق پریس کلب کے باہر احتجاج سے پیر ظہیر الحسن نے اعلیٰ عدلیہ کے خلاف نفرت پھیلائی اور ٹی ایل پی نائب امیر نے جسٹس فائزعیسیٰ کا سر لانے والے کو ایک کروڑ روپے دینے کا اعلان کیا۔
