ممبئی : بابا رام دیو ایک بار بھر بڑی مشکل میں پھنس گئے، بھارتی عدالت نے پتنجلی آیوروید پر 4کروڑ روپے جرمانہ عائد کردیا۔
تفصیلات کے مطابق ممبئی ہائی کورٹ نے ٹریڈ مارک کیس کی سماعت کے بعد پتنجلی آیوروید لمیٹڈ پر 2023ء کا عبوری حکم توڑنے پر چار کروڑ روپے جرمانہ عائد کردیا۔
عدالت کی جانب سے پتنجلی آیوروید لمیٹڈ پر منگلم آرگیانکس لمیٹڈ کے ٹریڈ مارک کیس میں کافور کی بنی اشیاء فروخت کرنے سے روکا گیا تھا۔
عدالت کے جج نے اپنے ریمارکس میں کہا کہ پتنجلی لمیٹڈ نے دانستہ طور پر عدالت کی حکم عدولی کی، بنچ نے منگلم آرگیانکس کی درخواست پر فیصلہ سنادیا۔
ممبئی ہائی کورٹ کے بنچ نے پتنجلی کو ہدایت کی کہ وہ دو ہفتہ کے اندر جرمانے کی 4 کروڑ روپے کی رقم جمع کرائے۔
یاد رہے کہ یہ رقم ان 50لاکھ روپے کے علاوہ ہے جو عدالت نے یکم جولائی کو کمپنی کو اس سے قبل جمع کرانے کی ہدایت کی تھی۔
