محکمہ موسمیات نے کہا ہے کہ طاقتور مون سون ہواؤں کا سلسلہ 2 اگست سے سندھ پر اثر انداز ہوگا جس کے زیراثر موسلادھار بارش کا امکان ہے۔
محکمہ موسمیات کے مطابق 2 اگست سے طاقتور مون سون ہواؤں کا سلسلہ راجستھان بھارت اور بحیرہ عرب سے سندھ پر اثر انداز ہوگا، نئے مون سون سسٹم سے متعلق الرٹ جاری کردیا گیا ہے۔
محکمہ موسمیات کا کہنا ہے کہ 3 اگست سے 5 اگست کے درمیان کراچی میں گرج چمک کیساتھ بارش ہوگی اس کے علاوہ تھر پارکر، بدین، سجاول، حیدرآباد، مٹیاری، ٹنڈومحمد خان، ٹنڈوالہ یار میں بارش کا امکان ہے۔
محکمہ موسمیات کے مطابق اس دوران سندھ کے دیگر شہر جیکب آباد، شکارپور، قمبر شہداد کوٹ، کشمور، لاڑکانہ، خیرپور، میرپورخاص، عمر کوٹ، نوشہرو فیروز، گھوٹکی، سکھر و دیگر علاقوں میں بارش متوقع ہے۔
محکمہ موسمیات کے مطابق موسلا دھار بارش کے باعث سندھ کے نشیبی علاقے زیرآب آسکتے ہیں، شدید بارشوں کے باعث نالوں میں طغیانی کا خدشہ ہے۔
پاکستان میں مون سون کی بارشوں کا دورانیہ اور اہمیت
پاکستان میں مون سون کی بارشوں کا دورانیہ عام طور پر جولائی سے ستمبر تک ہوتا ہے۔ یہ بارشیں ملک کے مختلف حصوں میں مختلف شدت اور مدت کے ساتھ برستی ہیں۔ مون سون کی آمد سے ملک کے کئی علاقوں میں خشک سالی کے بعد زندگی میں ایک نئی بہار آ جاتی ہے۔ یہ بارشیں نہ صرف زرعی پیداوار کے لیے بلکہ پانی کے ذخائر کو بھرپور کرنے اور موسم کو خوشگوار بنانے کے لیے بھی انتہائی اہم ہیں۔
تاہم، بعض اوقات یہ بارشیں اتنی شدید ہو جاتی ہیں کہ سیلاب کی صورت اختیار کر لیتی ہیں اور ملک کے مختلف علاقوں میں تباہی پھیل جاتی ہے۔ اس کے علاوہ، غیر متوقع اور بے وقت بارشیں بھی فصلوں کو نقصان پہنچا سکتی ہیں۔
