حماس کے رہنما اسماعیل ہنیہ کی ایران کے دارالحکومت تہران میں اسرائیلی حملے میں شہادت کے بعد مشرق وسطیٰ میں جنگ کے بادل چھا گئے ہیں۔
غیر ملکی ذرائع ابلاغ کے مطابق ایرانی فوج کے چیف آف اسٹاف میجر جنرل محمد حسین باقری کا کہنا ہے کہ اسرائیل سے حماس کے رہنما اسماعیل ہنیہ کی شہادت کا بدلہ لینے کا طریقہ زیر غور ہے۔
ایرانی فوج کے سربراہ کا کہنا تھا کہ ایران اسماعیل ہنیہ کے قتل کا بدلہ لینے کے طریقے کا جائزہ لے رہا ہے، ان کی شہادت کا بدلہ ضرور لیا جائے گا۔
میجر جنرل محمد حسین باقری نے مزید کہا کہ اسرائیل کو ہر حال میں پچھتانا پڑے گا، اسرائیل کے خلاف کئی اقدامات کیے جانے چاہئیں۔
دوسری جانب اسرائیل نے حماس کے عسکری ونگ القسام بریگیڈ کے کمانڈر محمد دیف کو قتل کرنے کا دعویٰ کیا ہے۔
اسرائیلی فوج کا کہنا ہے کہ ان کی انٹیلی جنس کی تصدیق ہے کہ حماس کے کمانڈر محمد دیف کو 13 جولائی کو ہونے والی فضائی بمباری میں ہلاک کیا گیا تھا۔
اسرائیلی وزیر خزانہ بیزل اسموٹریچ نے دعویٰ کیا ہے کہ حماس کے کمانڈر محمد دیف کے مبینہ طور پر قتل کی نشاندہی سے لگتا ہے ”حماس کی شکست پہلے سے کہیں زیادہ قریب ہے“۔
اسماعیل ہنیہ کا جسد خاکی گھر پہنچنے پر رقت آمیز مناظر کی ویڈیو
ان کا کہنا تھا کہ ہمیں فتح سے پہلے ایک لمحہ نہیں روکنا چاہئے ہم اس وقت تک جاری رکھیں گے جب تک کہ ہم ان سب کو ختم نہ کریں، سیکیورٹی کو بحال کریں اور اغوا شدہ لوگوں کو گھر واپس نہ لے آئیں۔
