پیرس اولمپکس میں پاکستان کے ایتھیلیٹ ایک کے بعد ایک بغیر میڈل باہر ہوتے جا رہے ہیں ایسے وفاقی وزیر رانا ثنا اللہ کی دریائے سین کی سیر کی ویڈیو وائرل ہو رہی ہے۔
پیرس میں جاری اولمپکس 2024 میں پاکستان کو اب تک میڈل کی تلاش ہے اور پاکستانی کھلاڑیوں کی بدترین کارکردگی کا یہ حال ہے کہ سات میں سے پانچ ایتھیلیٹ پہلے ہی راؤنڈ میں بغیر میڈل باہر ہوگئے ہیں۔
ایسے میں ایتھلیٹ کے ہمراہ پیرس جانے والے وفاقی وزیر بین الصوبائی رابطہ رانا ثنا اللہ کی پیرس میں کشتی میں دریائے سین کی سیر کرتے ہوئے ویڈیو سوشل میڈیا پ روائرل ہو رہی ہے جس کے بعد صارفین کی جانب سے تبصروں کا سلسلہ شروع ہو گیا ہے۔
ایک صارف نے یہ ویڈیو پوسٹ کرتے ہوئے طنزیہ کیپشن لکھا کہ ’’ماشااللہ، رانا صاحب اولمپکس میں سوئمرز کے لیے پانی کا جائزہ لے رہے ہیں۔
کچھ صارفین نے کہا کہ رانا ثنا اللہ میڈل کی تلاش میں پیرس کے دریائے سین کی جانب نکل پڑے ہیں۔
واضح رہے کہ پیرس اولمپکس میں پاکستان کے 18 رکنی دستے نے شرکت کی جس میں صرف 7 ایتھلیٹ شامل تھے بقیہ 11 آفیشلز اور وزارتی نمائندے ہیں جن میں رانا ثنا اللہ بھی شامل ہیں۔
سوئمرز مقابلوں میں احمد درانی 200 میٹر فری اسٹائل ہیٹس میں 30 سوئمرز میں سب سے آخری نمبر پر رہے جب کہ خاتون سوئمر جہاں آرا نبی کا سفر بھی 26 ویں پوزیشن کے ساتھ اختتام پذیر ہوا۔
شوٹنگ مقابلوں میں گلفام جوزف اور کشمالہ طلعت فائنل راؤنڈ میں جگہ نہ بنا سکے۔ سنگلز کے بعد گلفام جوزف اور کشمالہ مکسڈ ٹیم ایونٹ میں بھی ناکام رہے اور پاکستان کی 17 میں سے 14 ویں پوزیشن رہی جب کہ 25 میٹر پسٹل ریپڈ میں کشمالہ 40 میں سے 18 ویں نمبر پر رہیں۔
پاکستان کی ایک اور ایتھلیٹ فائقہ ریاض پریلمینیری راؤنڈ کی دوسری ہیٹ میں چھٹے نمبر پر رہیں۔
اب پاکستان کی امیدیں صرف جولین تھرو ماسٹر ارشد ندیم سے وابستہ ہیں جس کے مقابلے 6 اگست سے شروع ہوں گے۔
