اسلام آباد: پی ٹی آئی نے ضلعی انتظامیہ کو جلسہ اور احتجاج کرنےکی درخواست دیدی۔
جلسے اور احتجاج کی درخواست پی ٹی آئی کے ضلعی صدر عامر مسعود مغل کی جانب سے دی گئی ہے جس میں کہا گیا ہے کہ پی ٹی آئی کو عدالتی احکامات پر 13 اگست کو جلسہ کرنے کی اجازت دی جائے۔
درخواست کے مطابق ترنول، ایف نائن پارک یا جی نائن پشاور موڑ پر جلسہ کرنےکی اجازت دی جائے پی ٹی آئی 13 اگست کی شام 4 بجے جلسہ کرنا چاہتی ہے۔
درخواست میں کہا گیا ہے کہ پی ٹی آئی پریس کلب کے باہر 5 اگست کو احتجاجی مظاہرہ بھی کرنا چاہتی ہے۔
دوسری جانب پی ٹی آئی سینٹرل پنجاب کے سینئر نائب صدر اکمل خان باری نے میڈیا سے گفتگو میں کہا ہے کہ مینارِپاکستان پر جلسےکی اجازت کیلئے نئی درخواست دائر کریں گے، ڈی سی نےاپنی رپورٹ میں سیکیورٹی سےمتعلق جھوٹ بولا۔
ان کا کہنا تھا کہ دوسروں جماعتوں کے احتجاج کے وقت پنجاب حکومت کےخدشات کہاں تھے؟ پنجاب میں صرف پی ٹی آئی کیلئے شریف خاندان کا سول مارشل لا نافذ ہے پنجاب حکومت ہمت کرے دل بڑا کرے اور 14 اگست کو جلسے کی اجازت دے انشااللہ پنجاب میں جلد ظلم کاسورج غروب ہو گا۔
