اسلام آباد: راول ڈیم میں مبینہ طور پر زہر ملائے جانے سے ہزاروں مچھلیوں کی ہلاکت کی تحقیقات شروع کر دی گئی۔
تفصیلات کے مطابق پاکستان انوائرنمنٹل پروٹیکشن ایجنسی نے راول ڈیم کے پانی میں زہر ملائے جانے سے ہزاروں مچھلیوں کی ہلاکت کی تحقیقات کا آغاز کر دیا۔
پاک ای پی اے کی ٹیم نے ڈاکٹر ضیغم عباس کی قیادت میں راول ڈیم کا دورہ کیا، ٹیم نے ڈیم میں 3 مقامات پر پانی کے نمونے لیبارٹری ٹیسٹ کے لیے حاصل کر لیے۔
کشمیر چوک، ڈپلومیٹک انکلیو اور کورنگ روڈ پوائنٹس سے پانی کے نمونے لیے گئے ہیں، جو پاک ای پی اے کی لیبارٹری کو ٹیسٹ کے لیے بھیج دیے گئے ہیں، انوائرنمنٹل پروٹیکش ٹیم نے ڈیم کے پانی کا آن سائٹ فیزیو کیمیکل اینالسسز بھی کیا۔
لیبارٹری رپورٹ کی روشنی میں مچھلیوں کی ہلاکت کی وجوہ کا تعین کیا جائے گا، اور رپورٹ کی روشنی میں ذمہ داروں کے خلاف کارروائی بھی تجویز کی جائے گی۔
یاد رہے کہ راول ڈیم میں چند روز قبل مبینہ طور پر زہر ملائے جانے سے ہزاروں مچھلیاں ہلاک ہو گئی تھیں، جب کہ ڈیم کے پانی میں زہر ملانے کے پہلے بھی کئی واقعات سامنے آ چکے ہیں۔
