اسلام آباد : وزاعظم شہباز شریف نے نئی سیکریٹری خارجہ کے لئے آمنہ بلوچ کے نام کی منظوری دے دی۔
تفصیلات کے مطابق وزیراعظم شہباز شریف نے نئے سیکریٹری خارجہ کی بھی منظوری دے دی ہے، پاکستان کی یورپی یونین میں موجودہ سفیر آمنہ بلوچ نئی سیکریٹری خارجہ ہوں گی۔
دوسری جانب وزیر اعظم شہباز شریف نے پاکستان کے نئے سفرا کی تعیناتی کی منظوری دے دی۔
ذرائع نے بتایا کہ ممتاز زہرا بلوچ فرانس اور جانباز خان برونائی میں پاکستان کے نئے سفیر ہوں گے جبکہ محمد سلیم کینیڈا میں پاکستان کے نئے ہائی کمشنر ہوں گے۔
کویت میں تعینات پاکستانی سفیر ملک فاروق جنوبی افریقہ میں نئے ہائی کمشنر ہوں گے جبکہ یو اے ای میں پاکستانی سفیر فیصل نیاز ترمذی بیلجئیم اور یورپی یونین میں نئے سفیر ہوں گے۔
