لاہور: وزیر اعلیٰ پنجاب مریم نواز کی ہدایت پر گورنمنٹ تحصیل ہیڈ کوارٹر اسپتال میاں چنوں کا نام گورنمنٹ ٹی ایچ کیو ارشد ندیم اسپتال رکھ دیا گیا۔
صوبائی وزیر صحت خواجہ عمران نذیر نے بتایا کہ ملک کیلیے 32 سال بعد پہلا گولڈ میڈل حاصل کرنے والے پاکستانی ارشد ندیم کو خراج تحسین پیش کرنے کیلیے ان کے نام سے اسپتال کو منسوب کیا گیا ہے۔
خواجہ عمران نذیر نے کہا کہ پنجاب حکومت گولڈ میڈلسٹ ارشد ندیم کا واپسی پر فقیدالمثال استقبال بھی کرے گی، ارشد ندیم نے پیرس اولمپکس میں جیولن میں پہلا گولڈ میڈل حاصل کر کے پاکستان کا عالمی سطح پر نام روشن کیا ہے۔
محکمہ صحت پنجاب نے وزیر اعلیٰ مریم نواز کی ہدایت پر اسپتال جیولین تھرور کے نام سے منسوب کرنے کا باقاعدہ نوٹیفکیشن جاری کر دیا۔
ارشد ندیم کو سول ایوارڈ دینے کا اعلان
صدر مملکت آصف علی زرداری نے پاکستانی ایتھلیٹ کو پیرس اولمپکس میں ریکارڈ کارکردگی پر ہلال امتیاز سے نوازنے کی ہدایت دے دی۔
آصف علی زرداری ارشد ندیم کو کھیل کے میدان نمایاں خدمات کے اعتراف میں خصوصی تقریب میں سول ایوارڈ دیں گے۔
ان کی ہدایت پر ایوانِ صدر نے ارشد ندیم کو سول ایوارڈ دینے کیلیے کابینہ ڈویژن کو خط ارسال کر دیا جس میں لکھا گیا کہ ارشد ندیم نے بہترین کارکردگی سے کھیل کے میدان میں قوم کا سر فخر سے بلند کر دیا۔
صدر مملکت نے لکھا کہ ارشد ندیم کی عالمی سطح پر شاندار کامیابی قوم کیلئے فخر کا باعث بنی، انہوں نے ایتھلیٹکس کے میدان میں ملک کا نام روشن کیا اس لیے ارشد کو سول ایوارڈ آئین کے آرٹیکل 259 (2) کے تحت دیا جائے گا۔
