عالمی شہرت یافتہ پاکستانی گلوکار علی ظفر نے اپنی پہلی اے آئی میوزک ویڈیو میں تھر کی گلوکارہ ’نرملا‘ کو متعارف کرا دیا۔
گلوکار علی ظفر نے فوٹو اینڈ ویڈیو شیئرنگ ایپ انسٹاگرام پر ویڈیو شیئر کی جسکے ساتھ لکھے طویل کیپشن میں انہوں نے اے آئی سے تیار کردہ میوزک ویڈیو کے بارے میں بتایا ہے۔
گلوکار علی ظفر نے پوسٹ کے کیپشن میں لکھا کہ ’ کچھ سال پہلے، مجھے یوسف صلاح الدین کی طرف سے واٹس ایپ پر ایک گانے کا ڈیمو موصول ہوا، جس میں گلوکارہ نرملا سے میرا تعارف کرایا گیا تھا، میں فوری طور پر نرملا کی آواز اور کمپوزیشن کی مہارت سے متاثر ہوگیا تھا ‘۔
علی ظفر نے لکھا کہ مجھے یہ جان کر مزید تحریک ملی کہ یہ باصلاحیت نوجوان لڑکی جو سندھ کے دور دراز صحرا میں رہتی ہے جہاں زندگی کی بنیادی سہولتیں، خصوصاً پانی کی کمی ہے اور جہاں موسیقی خاص طور پر لڑکیوں کے لیے ایک ممنوعہ سمجھا جاتا ہے، اپنے بھائی کے مکمل تعاون کے ساتھ، موسیقی کے شوق کو پورا کر رہی ہے۔
گلوکار نے مزید لکھا کہ نرملا کے شوق اور عزم کو دیکھ کرمیں نے ان سے وعدہ کیا کہ میں ان کے گانے کی ریکارڈنگ، پروڈکشن کرونگا اور ساتھ ہی ایک میوزک ویڈیو بھی بناؤنگا، جب گانے کی پروڈکشن مکمل ہو گئی تو میں نے سوچ لیا تھا کہ ہمیں اس گانے کی ویڈیو کے لیے واقعی کچھ خاص بنانا ہے۔
علی ظفر نے نرملا کیلئے نیک تمناؤں کا اظہار کرتے ہوئے مزید لکھا کہ نرملا، اپنے خوابوں کی پیروی کرتی رہو اور کبھی بھی ہمت نہیں ہارنا۔
دوسری جانب گانے کی ریلیز پر گلوکارہ نرملا نے بھی اپنی خوشی کا اظہار کرتے ہوئے کہا کہ میں بیان نہیں کر سکتی کہ میں کتنی خوش ہوں، میں تمام تعاون کے لیے علی بھائی کی بہت مشکور ہوں۔