دوحہ: قطر ایئرویز نے جنوبی افریقہ کی ایئر لائن ایئرلنک میں 25 فی صد شیئر خرید لیے۔
غیر ملکی میڈیا رپورٹس کے مطابق ایئر لنک کے ساتھ اس معاہدے پر 20 اگست 2024 کو دوحہ میں دستخط کیے گئے ہیں، دونوں ایئر لائنز اس سے قبل بھی اپنی کچھ پروازوں کو کوڈ شیئر کرتی آ رہی ہیں۔
ایئرلنک کے سی ای او راجر فوسٹر نے جنوبی افریقی میڈیا کو انٹرویو میں بتایا کہ اگرچہ قطری ایئر لائن اقلیتی شیئر ہولڈر ہوگا، تاہم اسے جنوبی افریقی ایئرلائن کے بورڈ میں 2 نشستیں بھی دی جائیں گی۔
قطر ایئرویز پہلے ہی براعظم افریقہ کے 29 مقامات کے لیے پروازیں چلاتی آ رہی ہے، اب 60 سے زیادہ طیاروں والے فضائی بیڑے ایئرلنک کے ساتھ اشتراک کے سبب اس کے آپریشنز اور بھی وسیع ہوں گے۔
راجر فوسٹر کا کہنا تھا کہ ایئرلنک دراصل دوسری ایئرلائنز کے ساتھ اتحاد کرنے کی طرف مائل رہتی ہے، تاکہ غیر ملکی ایئرلائنز کو عالمی رسائی فراہم کر سکے۔ ان کا کہنا تھا کہ ایئرلنک کی شراکت داری فی الوقت تقریباً 36 مختلف ایئر لائنز (6 کوڈ شیئر ریلیشن شپس 30 انٹر لائن معاہدے) کے ساتھ قائم ہے۔
