بھارت میں خاتون ڈاکٹر کے ریپ اور قتل کا واقعہ رپورٹ ہونے کے بعد بھی خواتین پر ظلم کا سلسلہ جاری ہے، اترپردیش کے بریلی کے کوتوالی علاقے میں ہوٹل میں ایک لڑکی کو گلا کاٹ کر قتل کردیا گیا۔
بین الاقوامی خبر رساں ادارے کی رپورٹ کے مطابق ایس پی سٹی راہل بھاٹی کا اس حوالے سے کہنا ہے کہ قتل کے بعد ملزمان موقع سے فرار ہوگئے۔ واقعہ کا علم اس وقت ہوا جب ہوٹل کے کمرے سے بدبو اُٹھنا شروع ہوئی۔
پولیس ذرائع کا اس حوالے سے کہنا ہے کہ ہوٹل کے عملے نے اس معاملے کی اطلاع پولیس کو دی۔ پولیس نے موقع پر پہنچ کر لڑکی کی لاش کو پوسٹ مارٹم کے لیے روانہ کیا۔
پولیس کے مطابق لڑکی کو بے رحمی سے قتل کرنے والے ملزمان کی تلاش شروع کردی گئی ہے، جبکہ لڑکی کی شناخت تاحال نہیں ہوسکی ہے۔
اس سے قبل ایک اور واقعے میں ریاست کرناٹک کے شہر بنگلورو میں کالج کی نوجوان لڑکی کو جنسی زیادتی کا نشانہ بنا دیا گیا۔
بنگلورو میں 21 سالہ لڑکی کے ساتھ نامعلوم موٹر سائیکل سوار نے جنسی زیادتی کی۔ متاثرہ لڑکی نے ملزم سے لفٹ مانگی تھی۔
پولیس آفیسر رمن گپتا نے بتایا کہ کالج کی طالبہ سہیلیوں کے ساتھ ملاقات کے بعد گھر واپس جا رہی تھی، راستے میں انہوں نے ایک موٹر سائیکل سوار سے لفٹ لی جو اسے گھر چھوڑنے کے بجائے نامعلوم مقام پر لے گیا۔
رمن گپتا کے مطابق واقعہ اتوار کی صبح پیش آیا، متاثرہ طالبہ ہوسور سروس روڈ کے قریب ایک ٹرک کے پیچھے سے برآمد ہوئی جہاں اس نے اپنے جسم کو جیکٹ سے ڈھانپ رکھا تھا۔
متاثرہ لڑکی کے دوستوں نے اس کے پیغام اور لوکیشن ملنے کے بعد ڈھونڈا اور اسپتال منتقل کیا جہاں وہ زیرِ علاج ہے۔
پولیس کے مطابق لڑکی کی سہیلیوں نے دیکھا کہ ٹرک کے پاس ملزم صرف پینٹ پہنے کھڑا ہے، وہ انہیں دیکھ کر گھبراہٹ کا شکار ہوا اور موقع سے فرار ہوگیا۔
ٹرین میں ٹکٹ چیکر پر مسافروں کا حملہ، ویڈیو وائرل
رمن گپتا نے بتایا کہ لڑکی کی حالت مستحکم ہے جبکہ مزید تفصیلات میڈیکل ٹیسٹ کے بعد سامنے آئیں گی۔پولیس نے مقدمہ درج کر کے تفتیش شروع کر دی۔
