لاہور: پتنگ بازی کرنے والوں کی شامت آگئی ، اب 3 سے 5 سال قید کی سزا یا بیس لاکھ روپیہ جرمانہ ہوگا۔
تفصیلات کے مطابق محکمہ داخلہ پنجاب نے پتنگ بازوں کے گرد شکنجہ سخت کر دیا، پتنگ بازی پر پابندی ایکٹ دو ہزار سات میں کی گئی اہم ترامیم کو صوبائی کابینہ نے منظور کر لیا۔
ترامیم کی منظوری کے بعد پتنگ بنانے، اڑانے اور اسکی ٹرانسپورٹ پر جرمانے اور قید کی سزا مقرر کر دی گئی۔
پتنگ اڑانے والے کو تین سے پانچ سال قید کی سزا یا بیس لاکھ روپیہ جرمانہ یا بیک وقت قید اور جرمانہ دونوں کی سزا دی جاسکتی ہے۔
پتنگ بازی، پتنگ سازی اور ٹرانسپورٹ کرنا ناقابل ضمانت جرم قرار دے دیا گیا جبکہ پتنگ کیساتھ ساتھ دھاتی ڈور، تار، تندی اور مانجھا لگی ڈور کی تیاری، استعمال اور ٹرانسپورٹیشن بھی جرم قرار دیا۔
پنجاب کابینہ نے پتنگ بازی پر پابندی کے ایکٹ 2007 میں اہم ترامیم منظور کر لیں، پتنگ اڑانے والے کو تین سے پانچ سال قید یا بیس لاکھ جرمانہ یا دونوں ہوں گے۔
پتنگ اڑانے والے کو جرمانے کی عدم ادائیگی پر مذید ایک سال قید کی سزا ہوگی جبکہ پتنگ ساز اور ٹرانسپورٹر کو پانچ سے سات سال قید یا پچاس لاکھ جرمانہ یا دونوں ہوں گے۔
پتنگ بنانے والے اور ٹرانسپورٹر کو جرمانے کی عدم ادائیگی پر مذید دو سال قید کی سزا ہوگی۔
پتنگ بنانا اور اس کی ٹرانسپورٹیشن بھی ناقابل ضمانت جرم قرار دیا گیا ، پتنگ باز بچے کو پہلی بار وارننگ، دوسری بار پکڑے جانے پر پچاس ہزار جرمانہ ہوگا اور بچے کو تیسری دفعہ خلاف ورزی پر ایک لاکھ جرمانہ ہو گا
بچہ جرمانہ ادا نہ کر سکے تو اسکے والدین یا سرپرست سے وصول کیا جائے گا، چوتھی خلاف ورزی پر بچے کو جوینائل جسٹس سسٹم ایکٹ 2018ء کے تحت سزا اور جیل جانا پڑے گا۔
انسانی جانوں کے تحفظ کیلئے خونی کھیل کی روک تھام کے اقدامات ضروری ہیں، سزاؤں اور جرمانے میں کئی گنا اضافہ خونی کھیل کی حوصلہ شکنی کرے گا۔
