کناڈا فلموں کے مشہور اداکار درشن تھگودیپا کو جیل میں خاص ٹریٹمنٹ دیئے جانے کی خبر سامنے آنے پر بنگلور جیل کے افسران کو معطل کردیا گیا۔
بھارتی میڈیا کے مطابق اداکار درشن تھوگودیپا کو قید کے دوران خصوصی ٹریٹمنٹ دیے جانے کی تصاویر اور ویڈیوز وائرل ہونے کے بعد بنگلور جیل کے 7 افسران کو معطل کر دیا گیا ہے۔
درشن تھگودیپا بینگلور کی پرپنا اگراہارا سینٹرل جیل میں قید ہیں، گزشتہ روز ان کی ایک تصویر سوشل میڈیا پر گردش کررہی تھی، جس میں انہیں جیل کے اندر وی آئی پی انداز میں بیٹھے ہوئے دیکھا گیا تھا۔
کرناٹک کے وزیر داخلہ نے اس حوالے سے بتایا کہ ”پولیس نے وہاں جا کر تحقیقات کیں۔ ابتدائی تحقیقات کے بعد یہ بات سامنے آئی کہ اس میں 7 افسران ملوث ہیں جنہیں معطل کر دیا گیا ہے، جبکہ معاملے کی مزید انکوائری شروع کردی گئی ہے۔
بھارتی میڈیا کا کہنا ہے کہ درشن کو کنڑ اداکار کے مداح رینو کسوامی کے قتل کے کیس میں گرفتار کیا گیا تھا۔
9 جون کو بنگلور میں 33 سالہ آٹو ڈرائیور رینو کسوامی ایک فلائی اوور کے قریب مردہ حالت میں ملا تھا، مبینہ طور پر اسے درشن کی ہدایت پر ایک گینگ نے اغوا کرکے قتل کر دیا تھا کیونکہ انہوں نے اداکارہ پویترا گوڈا کو سوشل میڈیا پر مبینہ طور پر نازیبا پیغامات بھیجے تھے۔
معروف بھارتی اداکارہ کا ہدایت کار پر زیادتی کا الزام
اس کے بعد پولیس نے اداکار کو میسور میں ان کے فارم ہاؤس سے حراست میں لے لیا تھا، جبکہ 15 دیگر افراد کو بھی پولیس نے گرفتار کیا تھا۔
