کراچی: اولمپک گولڈ میڈلسٹ ارشد ندیم نے گورنر ہاؤس سندھ میں جیولن تھرو کا مظاہرہ کیا جس کی ویڈیو سامنے آگئی۔
گورنر ہاؤس سندھ میں ارشد ندیم کے اعزاز میں تقریب کا انعقاد کیا گیا جس میں گورنر کامران ٹیسوری اور مختلف ممالک کے سفارتکاروں نے شرکت کی۔
تقریب میں ارشد ندیم کا کہنا تھا کہ پاکستان کی انڈر 15 فٹبال ٹیم سلور کپ جیت کر آئی ہے اس کی بہت خوشی ہوئی ہے، گورنر سندھ ہر انسان کے ساتھ اس کی سپورٹ کر رہے ہیں، اگر ہر کوئی اس طرح کام کرے تو پاکستان بہت آگے چلا جائے گا۔
ارشد ندیم نے کامران ٹیسوری کو مخاطب کرتے ہوئے کہا کہ آپ سے ملنے کے بعد دوبارہ ملنے کی خواہش ہوتی ہے۔
تقریب سے خطاب کرتے ہوئے کامران ٹیسوری کا کہنا تھا کہ ارشد ندیم ہماری محبت میں آئے ہیں، کراچی کی تاجربرادری ارشد ندیم سے محبت کرتے ہیں۔
ان کا کہنا تھا کہ گورنر ہاؤس کے دروازے اسپورٹس مین کیلیے کھلے ہیں، اسپورٹس کو بھی گورنر انیشیٹو پروگرام میں شامل کر رہے ہیں، جنوری میں کراچی میراتھون کا انعقاد کریں گے۔
اس موقع پر ارشد ندیم نے سب کے سامنے جیولن تھرو کا مظاہرہ کیا۔
