بھارت کے سابق کرکٹر نے ویرات کوہلی کو تنبیہ کرتے ہوئے کہا تھا اگر تم نے ٹیسٹ کرکٹ میں 10 ہزار رنز نہ بنائے تو یہ تمہارے لیے شرم کا مقام ہوگا۔
ویرات کوہلی اس وقت 36 سال کے ہونے والے ہیں اور وہ خود کو دنیائے کرکٹ کے بہترین بیٹرز میں سے ایک کے طور پر منواچکے ہیں جبکہ بھارت میں ان کا مقابلہ لٹل ماسٹر سچن ٹنڈولکر سے بھی کیا جاتا ہے، ٹنڈولکر کے کئی ریکارڈز کوہلی نے توڑے ہیں۔
کئی لوگوں کا خیال ہے کرکٹ میں کوہلی نے اس وقت عروج کی جانب سفر شروع کیا تھا جب انھوں نے 2012 میں ہوبارٹ میں بھارت کی جانب سے 321 رنز کے تعاقب میں شاندار 133 رنز اسکور کیے تھے اور ان کی ٹیم نے ہدف کامیابی سے حاصل کیا تھا۔
ہربھجن سنگھ جنھوں نے 7 سے 8 سال تک ویرات کوہلی کے ساتھ ڈریسنگ روم شیئر کیا ہے، انھوں نے کہا کہ کوہلی اپنی ڈیبیو سیریز میں ہاف سنچری اسکور کرنے کے باوجود مطمئن نہیں تھے۔
انھوں نے کہا کہ یہ سیریز سری لنکا کےخلاف تھی اور اس میں اجنتھا مینڈس بہت اچھی بولنگ کررہے تھے، کوہلی نے مجھ سے کہا کہ پا جی مجھے مینڈس کو بولنگ کو اور مارنا چاہیے تھا اور مجھے ان کا یہ طرز عمل بہت اچھا لگا۔
ہربھجن کا مزید کہنا تھا کہ ہم ویسٹ انڈیز کے ٹور پر تھے اور کوہلی وہاں بہتر نہیں کھیل پائے تھے، وہ اپنے حوالے سے شبہات کا شکار تھے، میں نے انھیں اس وقت کہا تھا کہ اگر تم نے ٹیسٹ کرکٹ میں 10 ہزار رنز نہیں بنائے تو یہ تمہارے لیے شرم کا مقام ہوگا۔
سابق بھارتی آف اسپنر نے بتایا کہ میں نے کوہلی کو کہا کہ تم میں وہ صلاحیت ہے کہ ٹیسٹ کرکٹ میں 10 ہزار رنز اسکور کرسکتے ہو، اگر تم نے ایسا نہیں کیا تو یہ تمہاری اپنی غلطی ہوگی۔
