پاکستان کرکٹ ٹیم کے سابق کپتان سرفراز احمد نے کہا ہے کہ ٹیم کا برا وقت چل رہاہے امید کرتے ہیں اچھا وقت جلد آئے گا۔
قومی کرکٹ ٹیم کے کھلاڑی سرفراز احمد نے ایک بیان میں کہا کہ سب کی خواہش ہے پاکستان میں کرکٹ بہتر ہو، کوشش کریں گے پاکستان کرکٹ ٹیم کو اچھے لڑکے مل سکیں۔
انہوں نے کہا کہ قومی کرکٹ ٹیم کو بہتر کرنے کیلئے سب کو کام کرنا ہوگا، ٹیم کا برا وقت چل رہاہے امید کرتے ہیں اچھا وقت جلد آئیگا، مشکل وقت کے بعد ہمیشہ پاکستان کرکٹ ٹیم کھڑی ہوتی ہے۔
سرفراز احمد نے کہا کہ پاکستان کی ڈومیسٹک کرکٹ بہتر سے بہتر ہونی چاہیے، ملک بھر سے اچھے لڑکے سلیکٹ کر کے ان کو آگے لائیں گے، ساری ورکنگ کرنے کے بعد ہم نے پلیئرز کو سلیکٹ کیا۔
قومی کھلاڑی کا کہنا تھا کہ انڈر19 میں ہمارے پاس زبردست فاسٹ بالر ہیں، ڈومیسٹک سیزن اور انڈر19 پر مشتمل ٹیم بنائی ہے، ٹیم اچھی ہونے سے چیزیں آسان ہوجاتی ہیں، امید ہے اچھا کام کرکے رزلٹ دیں گے۔
سرفراز احمد کا کہنا تھا کہ مجھے لگتاہے میں کرکٹ کھیل سکتا ہوں تو کھیل رہا ہوں، جب لگے گا کرکٹ نہیں کھیل سکتا تو نہیں کھیلوں گا، نوجوان کھلاڑی پرفارم کریں گے تو ٹیم میں خودبخود جگہ بن جائیگی۔
ان کا مزید کہنا تھا کہ جو سینئر لڑکے ٹیم میں ہیں انہوں نے پرفارمنس دے کر جگہ بنائی، جب وقت آئے گا تو جونیئر خود سینئر کی جگہ لے لیں گے۔
