اسلام آباد: خیبر پختونخوا کے وزیر اعلیٰ علی امین گنڈاپور نے وارنٹ گرفتاری کو غیر قانونی قرار دیتے ہوئے سیشن عدالت سے رجوع کر لیا۔
تفصیلات کے مطابق ڈسٹرکٹ اینڈ سیشن کورٹس اسلام آباد میں وزیر اعلیٰ کے پی نے اسلحہ اور شراب برآمدگی کیس میں وارنٹ گرفتاری پر ایک نظرثانی درخواست دائر کی ہے۔
نظرثانی درخواست وکیل ظہور الحسن ایڈووکیٹ کے ذریعے گزشتہ روز کے جوڈیشل مجسٹریٹ کے آرڈر کے خلاف دائر کی گئی ہے، درخواست میں مؤقف اپنایا گیا ہے کہ علی امین گنڈاپور کی مقدمے سے بریت کی درخواست زیر التوا ہے، اور عدالت نے خلاف قانون وارنٹ گرفتاری جاری کیے۔
درخواست میں عدالت سے استدعا کی گئی ہے کہ وارنٹ گرفتاری جاری کرنے کے حکم نامے کے خلاف نظر ثانی منظور کی جائے۔
علی امین گنڈاپور کو گرفتار کرکے آج سیشن کورٹ میں پیش کرنے کا حکم
یاد رہے کہ گزشتہ روز سول جج شائستہ خان کنڈی نے علی امین گنڈاپور کی طبی بنیاد پر حاضری معافی کی درخواست مسترد کرتے ہوئے ناقابل ضمانت وارنٹ جاری کیے تھے۔ جوڈیشل مجسٹریٹ نے تحریری حکم نامے میں کہا تھا کہ راجہ ظہور الحسن ایڈووکیٹ نے وزیر اعلیٰ کے پی کی آج عدالت پیشی کی یقین دہانی کرائی تھی لیکن آج بھی پیش نہ ہوئے اور حاضری سے استثنٰی کی درخواست دائر کی گئی۔
عدالت کا کہنا تھا کہ متعدد مواقع فراہم کیے جانے کے باوجود علی امین 342 کا بیان ریکارڈ نہیں کروا رہے، ایس ایچ او تھانہ بارہ کہو وزیر اعلیٰ کو گرفتار کر کے 5 ستمبر کو عدالت میں پیش کریں۔
