پاکستان پیپلز پارٹی کی رہنما شرمیلا فارقی نے کہا ہے کہ جب کوئی چیز ہونے جارہی ہوتی ہے تو کوئی میجک نمبر بھی آجاتا ہے۔
تفصیلات کے مطابق پاکستان پیپلز پارٹی کی رہنما اور ایم این اے شرمیلا فاروقی نے کہا ہے کہ خصوصی کمیٹی میں تمام سیاسی جماعتوں کی نمائندگی شامل ہے، وقت اور حالات کے مطابق ترامیم لائی جاتی ہیں۔
انہوں نے کہا کہ مولانا کی خواہش ہے کہ اپوزیشن بھی آن بورڈ ہو، اس ترامیم پر کسی کو کوئی اعتراض نہ ہو اس لیے آئینی ترامیم میں جلد بازی کسی کو بھی نہیں ہے، آئینی عدالت بالکل بنے گی، یہ میثاق جمہوریت میں شامل ہے، بہت سے مقدمات زیر التوا ہیں، لوگوں کے مسائل حل نہیں ہورہے۔
شرمیلا فاروقی نے کہا کہ ہم سے مکمل مسودہ شیئر نہیں کیا گیا ہے، ہمیں بلاول بھٹو پر مکمل اعتماد ہے، جو بھی آئینی ترامیم ہونگیں وہ قوم، ملک اور پارلیمنٹ کے وقار کیلئے بہتر ہونگیں، پارلیمنٹ کی خصوصی کمیٹی کے اراکین کو آئینی ترامیم کے مسودے کا علم ہے۔
شرمیلا فاروقی کا کہنا تھا کہ مولانا فضل الرحمان نے کمیٹی میں خصوصی شرکت کی، مسودے پر مشاورت جاری ہے، مولانا فضل الرحمان مانیں گے یا نہیں یہ ان کی جماعت ہی بہتر بتاسکتی ہے، اس ترامیم کے لیے تمام جماعتوں کی مشاورت ضروری ہوتی ہے، اس میں ایک دو دن بھی لگ سکتے ہیں۔
