اسلام آباد: جے یو آئی (ف) کے رہنما حافظ حمداللہ نے کہا ہے مسودہ پیش کرنے تک جے یو آئی اس کی حمایت نہیں کریگی ہمارا مؤقف ہے پہلے مسودہ منظر عام پر لایا جائے۔
تفصیلات کے مطابق جمعت علمائے اسلام (ف) کے رہنما حافظ حمداللہ نے ایک بیان میں کہا ہے کہ جو آئینی ترامیم حکومت چاہتی ہے اس کا مسودہ کہاں ہے، سامنے لایا جائے، مسودہ پیش کرنے تک جے یو آئی اس کی حمایت نہیں کریگی۔
حافظ حمداللہ نے کہا کہ وفاقی وزرا کہتے ہیں انہیں بھی اس آئینی ترامیم کا علم نہیں تو یہ مسودہ آیا کہاں سے ہے؟ جےیوآئی سے ملاقات کیلئے ن لیگ، پی پی سمیت دیگر سیاسی وفود آرہے ہیں لیکن حکومت کی سپورٹ ہم آنکھیں بند کر کے کیسے کریں؟۔
جے یو آئی رہنما نے کہا کہ جےیوآئی نہ ن لیگ ہے نہ ہی پیپلزپارٹی ہے، کیا مولانا سونے کیلئے ٹائم مانگ رہے ہیں یا حلوہ کھانے کیلئے؟ وہ قانون سازی ہونی چاہیے جو ملک اور عوام کے مفادمیں ہو، آئینی ترامیم کیا ہیں، اگریہ آئینی ترامیم ملکی مفاد میں کی جارہی ہے تو اس کو چھپایا کیوں جارہا ہے؟۔
حافظ حمداللہ کا کہنا تھا کہ حکومتی وزرا کہتے رہے کہ ان کے نمبرز پورے ہیں اگر ان کے نمبرز پورے ہیں تو کیوں منظوری نہیں ہوئی، قومی اسمبلی اور سینیٹ کا اجلاس کیوں ملتوی کیا گیا؟ اسکا یہی مطلب ہے نمبرز پورے نہیں ہیں۔
حافظ حمداللہ نے مزید کہا کہ آپ کو کس نے مجبور کیا کہ اتوار کے دن قومی اسمبلی اور سینیٹ کا اجلاس بلاتے، حکومتی وزرا کو جلدی کیوں ہے، اس کا جواب ان کے پاس بھی نہیں ہے۔
حافظ حمداللہ نے کہا کہ پارلیمنٹ پر جو یلغار ہورہی تھی اسے مولانا فضل الرحمان نے پسپا کیا ہے اور اس بات کا اعتراف پی ٹی آئی بھی کررہی ہے اور مولانافضل الرحمان کے اقدام کو سراہتی ہے۔
