آکسفورڈ: سانحہ آرمی پبلک اسکول میں زخمی ہونے والے احمد نواز کو شاہ چارلس سوئم نے برطانیہ کا اعلیٰ ترین اعزاز دینے کا اعلان کیا ہے۔
شاہ چارلس سوئم کی جانب سے احمد نواز کو برٹش ایمپائر میڈل دینے کا اعلان کیا گیا ہے، برٹش ایمپائر میڈل برطانیہ کا اعلیٰ ترین اعزاز ہے، احمد نواز کا کہنا تھا کہ یہ اعزاز میرے غیرمتزلزل عزم کا ثبوت ہے۔
احمد نواز نے کہا کہ یہ اعزاز دنیا بھر میں نوجوانوں کو بااختیار بنانے کیلئے خدمات کا اعتراف ہے، اس اعزاز سے اپنا سفر جاری رکھنے کا میرا عزم مضبوط ہوا۔
سانحہ آرمی پبلک اسکول میں زخمی ہونے والے احمد نواز نے مزید کہا کہ آئندہ سالوں میں نوجوانوں کو مزید بااختیار بناتا رہوں گا۔
واضح رہے کہ سال 2014 میں آرمی پبلک اسکول پشاور میں معصوم بچوں کو دہشتگردی کا نشانہ بنا کر پاکستان کو گہری چوٹ پہنچائی گئی تھی، 6 مسلح دہشتگرد اسکول پر حملہ آور ہوئے تھے۔
جدید اسلحے سے لیس ظالم ترین دشمنوں نے نہتے بچوں اور اساتذہ کو نشانہ بنایا تھا، انسانیت کے لفظ سے بھی ناآشنا دہشتگردوں نے 132 بچوں سمیت 149 افراد کو شہید کیا تھا۔
