سیالکوٹ: وزیر دفاع خواجہ آصف نے کہا ہے کہ پی ٹی آئی بھی آئینی ترامیم پر راضی ہے مگر دسمبر تک کا وقت مانگ رہی ہے۔
تفصیلات کے مطابق خواجہ آصف نے کہا کہ پی ٹی آئی بھی آئینی ترامیم پر راضی ہے، حکومت کا مسودہ راز نہیں رہا ہر شخص جانتا ہے، مجوزہ آئینی ترمیم کا مسودہ ہر لیڈر کے پاس ہے، آئینی ترمیم کا مسودہ پبلک ڈاکومنٹ ہے کوئی سیکریٹ نہیں۔
انھوں نے کہا کہ آئینی ترمیم کا مقصد صرف احتساب نہیں بلکہ اداروں میں طاقت کا توازن ہے، ججز کی تقرری کا اختیار اس وقت بھی جوڈیشری کے پاس ہے، ایک ایک چیمبر سے پانچ پانچ وکیل جج ہیں۔
خواجہ آصف نے کہا کہ بانی پی ٹی آئی نے اتنی وارداتیں کی ہیں ان کیلئے آئینی ترمیم کی ضرورت نہیں ہے، بانی پی ٹی آئی صرف آئینی ترمیم نہیں پاکستان کی ہر چیز اپنے ساتھ نتھی کرنا چاہتے ہیں، بانی پی ٹی آئی خود کو ہر چیز کا محور سمجھتے ہیں۔
وزیر دفاع نے کہا کہ بانی پی ٹی آئی نے 4 سال جو گل کھلائے ہیں ان پر نظر دوڑائیں، بانی پی ٹی آئی نے 9 مئی کو بغاوت کرنے کی کوشش کی۔
انھوں نے کہا کہ سانحہ 9 مئی میں فوج کے ادارے کے لوگ بھی تھے جو فیض کے ساتھ تھے، بانی پی ٹی آئی قید میں ابتک 4 ہزار بار کہہ چکے اسٹیبلشمنٹ سے بات کروں گا۔
خواجہ آصف نے کہا کہ سیاستدانوں کا احتساب ہوتا ہے مقدمے بھی بنتے ہیں تنخواہ صرف 2 لاکھ روپے ہے، ججز کو بھاری تنخواہیں اور مراعات ملتی ہیں پھر بھی 27 لاکھ کیسزعدالتوں میں پڑے ہیں۔
