بگ باس سے مشہور ہونے والے تاجکستانی گلوکار اور انفلوئنسر عبدو روزک نے اپنی منگیتر سے شادی نہ کرنے کا اعلان کرکے سب کو حیران کردیا۔
تاجکستانی گلوکار جنھوں نے بگ باس کے 16ویں سیزن میں شرکت کرکے کافی شہرت حاصل کی تھی اب اچانک اپنی منگنی ختم کرنے اور امیرہ سے شادی نہ کرنے کا اعلان کیا ہے، عبدو روزک اور ان کی منگیتر دونوں ہی 20 سال کے ہیں اور انھوں نے اپریل میں اپنی منگنی کا اعلان کیا تھا۔
عبدو روزک نے اپنے پیغام میں کہا کہ مجھے افسوس کے ساتھ اعلان کرنا پڑرہا ہے کہ میں نے اپنی شادی کا ارادہ منسوخ کردیا ہے، اپنے اس سفر کے دوران ہم نے محسوس کیا کہ ہمارے درمیان ثقاتوں کا کافی فرق پایا جاتا ہے۔
پستہ قد گلوکار نے مزید لکھا کہ جیسا کہ آپ سب جانتے ہیں کہ میں ہر کام پُرعزم طریقے سے کرنے والا شخص ہوں اور اس زندگی کے اپنے چیلنجز ہوتے ہیں۔
عبدو روزک کا مزید کہنا تھا مجھے دماغی طور پر نہایت مضبوط اور متواز شریک حیات درکار ہے جو میرے ساتھ چیلنجز کے حساب سے چل سکے۔
خیال رہے کہ بھارتی رئیلیٹی شو بگ باس کے 16ویں سیزن سے شہرت حاصل کرنے والے عبدو روزک نے اس سے قبل بیھ اپنی شادی کی تقریب ملتوی کی تھی۔
انھوں نے اسی سال مئی میں فوٹو اینڈ ویڈیو شیئرنگ ایپ انسٹاگرام پر اپنی منگنی کی تصاویر جاری کی تھیں ساتھ ہی انھوں نے اپنی شادی کی تاریخ کا اعلان بھی کیا تھا۔
تاہم اب بھارتی میڈیا نے بتایا تھا کہ عبدو روزک نے اہم مصروفیت کی وجہ سے شادی کی تاریخ آگے بڑھا دی ان کی شادی رواں سال 7 جولائی کو نہیں ہوگی۔
بھارتی میڈیا کا کہنا تھا کہ عبدو روزک نے شادی ملتوی ہونے کی وجہ بتاتے ہوئے کہا کہ ’انھیں پہلے باکسنگ میچ کی پیشکش ہوئی ہے جو کہ دبئی میں 6 جولائی کو ہوگا‘۔
