پاکستان کا دورہ کرنے والے آئی سی سی کے وفد نے آئندہ سال شیڈول چیمپئنز ٹرافی کے انتظامات پر اطمینان کا اظہار کیا ہے۔
اے آر وائی نیوز کے مطابق پاکستان کا دورہ کرنے والے آئی سی سی کے پانچ رکنی وفد نے کراچی، لاہور اور پنڈی اسٹیڈیم کے دورے کے بعد آئندہ سال شیڈول چیمپئنز ٹرافی کے انتظامات پر اپنے مکمل اطمینان کا اظہار کیا ہے۔
چیئرمین پاکستان کرکٹ بورڈ محسن نقوی سے آئی سی سی وفد (جس میں سینئر مینیجر ایونٹس سارہ ایڈگر، سیکیورٹی مینیجر ڈیوڈ مسکر ودیگر نمائندے شامل ہیں) نے ملاقات کی جس میں چیمپئنز ٹرافی 2025 کی تیاریوں سے متعلق تبادلہ خیال کیا گیا اور وفد نے تینوں اسٹیڈیمز میں لاجسٹک اور سیکیورٹی انتظامات کو تسلی بخش قرار دیا۔
اس موقع پر چیئرمین پی سی بی نے آئی سی سی وفد کو چیمپئنز ٹرافی کے لیے عالمی معیار کے انتظامات کی یقین دہانی کراتے ہوئے کہا کہ اسٹیڈیمز کی اپ گریڈیشن کا کام میگا ایونٹ سے قبل مکمل کر لیا جائے گا اور تمام ٹیموں کے لیے فول پروف سیکیورٹی انتظامات کیے جائیں گے۔
محسن نقوی نے کہا کہ آئی سی سی چیمپئنز ٹرافی ٹورنامنٹ کا پاکستان میں انعقاد ایک اعزاز ہے۔ یہ جتنا بڑا ٹورنامنٹ ہے، ہم اس کے مطابق ہی انتظامات کو حتمی شکل دے رہے ہیں۔ تمام ٹیموں کے کھلاڑی پُر امن اور محفوظ ماحول میں کرکٹ انجوائے کریں گے۔
ان کا کہنا تھا کہ اپ گریڈیشن کے بعد اسٹیڈیمز میں بین الاقوامی معیار کی سہولتیں ہوں گی شائقین کرکٹ میچز سے پہلے سے بھی زیادہ محظوظ ہوں گے۔
