فیصل آباد : بچوں کی لڑائی کی رنجش پر فیصل آباد گھر میں گھس کر 16 سالہ لڑکی کے بال کاٹ کر چہرہ کالا کر دیا۔
تفصیلات کے مطابق فیصل آباد کے چک 558 میں بچوں کی لڑائی کی رنجش پر سات افراد نے 16 سالہ لڑکی پر تشدد کرکے بال کاٹے اور چہرہ کالا کر دیا۔
پولیس نے بتایا کہ گزشتہ روز بچوں کی لڑائی پر ریاض اور خالد کے اہلخانہ کے مابین تلخ کلامی ہوئی تھی ، اسی رنجش پر ملزمان نے بدھ کے روز ریاض کے گھر گھس کر اس کی سولہ سالہ بیٹی ثنا کو زبردستی بازار میں لا کر تشدد کا نشانہ بنایا۔
حکام کا کہنا تھا کہ ملزمان نے ثنا کے سر کے بال کاٹ دیئے اور چہرہ بھی کالا کیا تاہم ماموں کانجن پولیس نے ریاض کی مدعیت میں پانچ دفعات کے تحت مقدمہ درج کر کے تین ملزمان سلطان ، اس کے بیٹے خالد اور ساتھی مظہر کو گرفتار کر لیا۔
پولیس کا کہنا تھا کہ تین خواتین انور بی بی ، ذکیہ ، نصرت سمیت چار ملزمان فرار ہیں۔
